Pavlodar oblysy prokýrorynyń orynbasary sotqa jańadan ashylǵan mán-jaılarǵa baılanysty Pavlodar oblysynyń burynǵy ákimine qatysty is boıynsha óndiristi qaıta bastaý týraly ótinishhatpen júgindi, dep habarlaıdy Egemen.kz.
«Pavlodar qalasynyń № 2 sotynyń 2020 jylǵy úkimimen eks-ákimi QR QK-niń 361-baby 4-bóligi 3) tarmaǵy boıynsha qosymsha eseptelgen salyqtardy azaıtý maqsatynda laýazymdyq ókilettikterin asyra paıdalanǵany úshin sottalǵan. Onyń bul áreketi JShS-nyń tıisti salyǵyn tólemeýge múmkindik bergen.
Ekonomıkalyq tergep-tekserý departamenti tergeýshisiniń 2022 jylǵy qaýlysymen, memlekettik kirister departamenti qyzmetkerleriniń salyqty qate esepteýiniń saraptama qorytyndysymen qylmystyq quqyq buzýshylyqtyń bolmaýyna baılanysty JShS-niń salyqty tólemeýi týraly is toqtatyldy», delingen sot málimetinde.
Tergeýshiniń isti toqtatýyna baılanysty Pavlodar oblysynyń mamandandyrylǵan aýdanaralyq ákimshilik soty qosymsha salyqty esepteý týraly habarlamanyń kúshin joıdy.
Osylaısha, memleket múddesine aıtarlyqtaı zııan keltirilmedi.
Bul mán-jaı sotqa úkim shyǵarý kezinde belgisiz bolǵan.
Joǵaryda kórsetilgenderge baılanysty sot prokýrordyń ótinishimen kelisip, QPK 505-babynyń negizinde sot úkiminiń kúshin joıdy. Qylmystyq is áreketterinde quqyq buzýshylyqtyń bolmaýyna baılanysty sottalýshy aqtaldy.
Qaýly zańdy kúshine engen joq.