Týa salyp anasy tastap ketken soń, sheteldik otbasy asyrap alǵan Jánibek esimdi qazaq balasy 21 jyldan soń anasyn izdep keldi, dep habarlaıdy Egemen.kz.
Bul týraly jelidegi paraqshasyna belgili jýrnalıst Oljas Berkimbaev jazdy.
«Myna vıdeoda aǵylshynsha sóılep, Sizderden kómek surap otyrǵan jigittiń esimi – Jánibek, biraq qazirgi qujatynda EddıJan dep jazylǵan.
Ulty – qazaq, 2002 jyldyń 17 qańtary kúni Arqalyq qalasynda dúnıege kelgen. 2004 jyly sol qaladaǵy balalar úıinen qazirgi belgııalyq otbasy, ıaǵnı jalǵyz basty anasy asyrap alýǵa alyp ketken. Týǵan anamnyń úshinshi balasy bolýym múmkin deıdi ol. Flamand tilinde ósken ol, qazaqsha ne oryssha bilmeıdi. Esesine, aǵylshyn, ıspan, fransýz, nemis tilderinde sóıleıdi», - dep jazǵan avtor.
Jánibek qazir Ispanııanyń Malorka aralynda turady eken. Asyrap alǵan otbasy oǵan eýropasha bilim berip ósirgen. Osy kúnderi Astanada, óziniń týǵan áke-sheshesin izdep kelipti.
«Týǵan áke-sheshemnen túk kerek emes, tek anamnyń júzin kórip, bir ret qushaqtap, júregimdi tynshytsam boldy degen Jánibek myna vıdeony búgin neshe ret túsirgenin bilseńiz ǵoı... Áli tolqyp júrmin, ana týraly oılasam, emosııamdy basqara almaı qalamyn deıdi.20 jeltoqsan Astanadan Ispanııaǵa ushyp ketetin Jánibek, barshańyzdan kómek kútip otyr. Qazaqstan tym alys, endi qashan kelerim belgisiz, munda túrim qazaq, tilim ózgeshe bári birtúrli qaraıdy deıdi», delingen jelidegi jazbada.
Belgili bolǵandaı, Malorkada ol atbegilikpen aınalysady. Jylqyny jaqsy kóredi.