Abaı oblysy Aıagóz aýdanynyń oqýshylary aqyldy velosıped qurastyrdy, dep habarlaıdy Egemen.kz.
«Habar 24» telearnasynyń jazýynsha, olar birneshe ónertabystaryn usynǵan. Máselen, Ecobike dep atalatyn ınnovasııalyq kólik elektr qýatyn óndiredi. Al "Ekobaık" dep atalatyn velosıpedti bir aıda qurastyrdy. Izdenimpaz oqýshylar men qoldaýshy ustazdardyń ıdeıasy iske asty. Kólikti qurastyrýǵa qosalqy bólshekter qoldanyp, akkýmýlıator ornatqan.
«Bul "Qaldyqsyz mektep" jobasy aıasynda jasalǵan qurylǵy. Qosalqy bólshekterden. Barlyǵy qoldan jasaldy. Arnaıy generatorǵa dıod qoıylyp, sol arqyly zarıad beriledi. Oqýshylar 15 mınýt úzilis kezinde uıaly telefondaryn qýattaýǵa bolady», - deıdi eńbek pániniń muǵalimi Berik Ysqaqov.
Qurylǵynyń bir ereksheligi - mekteptegi tazalyqty da qadaǵalaıdy.
«Bizge qaı jerde qaı jáshik tolyp ketkenin aıtyp otyra alady. Mysalǵa biz qalanyń nemese mekteptiń kartasyn qura alamyz. Odan keıin birinshi jáshik tolyp ketti me, ekinshi qabattaǵy jáshik tolyp ketti me, sony kórsetip aıtady bizge», - deıdi oqýshy Janerke Zakırova.
Sonymen qatar, ónertapqysh oqýshylar zaǵıp jandarǵa arnalǵan elektrondy taıaq jasady. Múmkindigi shekteýli adamnyń aldynan kedergi shyqsa, qurylǵy birden belgi beredi.
«Zaǵıp jandardyń jaraqat alýynyń aldyn alady. Iаǵnı, kedergilerdi kórip, sıgnal beredi. Sol Qazaqstanda óte az. Sırek kezdesedi. Kózi nashar kóretin jandar bul taıaqqa qyzyǵýshylyq tanytyp otyr. Endi jobanyń avtory qulaǵy nashar estıtin jandar úshin vıbrasııalyq belgi beretin qurylǵy jasaýdy josparlap otyr», - deıdi oqýshy Eraly Ybyraev.