Qanshama aıtylyp, jazylyp jatsa da, júre tyńdaıtynymyz, den qoımaıtynymyzdyń saldarynan energetıkalyq sýsynnyń saýdasy qyzyp-aq tur.
Jezqazǵan qalalyq Jedel járdem qyzmetine Djamal Gýrbanov degen azamattyń ólim aýzynda jatqany týraly habar túsedi. Tynys alýy nasharlaǵan, tula boıyn ter basqan ol dereý Jezqazǵandaǵy medısınalyq ortalyqtyń jansaqtaý bólimine jetkiziledi. Oǵan mıokard ınfarkti degen dıagnoz qoıylady da angıograftyń kómegimen dereý operasııa jasalady. Jarty saǵat jasalǵan operasııadan soń aýrý ómirge qaıta oralady.
– Bárine sebepshi bolǵan – sergitkish, ıaǵnı energetıkalyq sýsyndar. Bizdiń pasıentimiz sonyń bir kúnde birden bes shólmegin ishken kórinedi. Ol buryn da bul sýsyndy paıdalanyp júrgen ǵoı. Aqyrynda, onyń qan tamyrlary bitelýge aınalǵan. Biz stend qoıýǵa májbúr boldyq, – deıdi reanımatolog Jasulan Iskakov.
– Energetıkalyq sýsyndar aýrýǵa dýshar etedi degendi jıi estisem de, mán bermeı keldim. Aýrýhana kereýetine tańylǵanda ǵana ótkenime kóz júgirtip, jibergen qateligimdi túsindim. Júrekke salmaq salǵan sýsyndar áýelide meni sergitti. Bara-bara uıqymdy qashyrdy. Júregim jıi soǵyp, sál qımyldasam entigetin jaǵdaıǵa jettim. Sonda da energetıktiń kesiri ekenin moıyndamadym. Sońy óte qaıǵyly jaǵdaıǵa ákele jazdady. Dárigerlerdiń arqasynda ǵana aman qalyp otyrmyn, kóretin jaryǵym bar eken, degen D.Gýrbanov endi qaıtyp sergitkishke jolamaıtynyn aıtady.
Mamandardyń mundaı sýsynnyń densaýlyqqa óte zııan ekenin aıtqanyna sený úshin mindetti túrde aýrýhana tósegine tańylý kerek pe? Bul barshamyzdy oılandyrýǵa tıis. D.Gýrbanov 41 jastaǵy aqyl toqtatqan azamat desek, jastar jaǵy eskertpelerge múlde qulaq asa qoımaıdy ǵoı.
Infarkt jas talǵamaıdy. Sondyqtan onyń em-domy MÁMS esebinen júrgiziledi.
«Jezqazǵan medısınalyq ortalyǵy» JShS-nyń kardıologııalyq bólimi 24 orynǵa shaqtalǵan. Munda jyl basynan beri 313 naýqasqa koronarografııa jasalyp, jedel mıokard ınfarkti dıagnozy qoıylǵan eken. Olardyń barlyǵyna quny 1,5 mln teńgeden bastalatyn koronarlyq shýnttaý operasııasy sátti jasalyp, qazir ońaltý kýrsynan ótip jatyr. MÁMS júıesindegi medısınalyq kómek barlyq saqtandyrylǵan azamatqa olardyń jarnalarynyń mólsherine qaramastan, tegin kórsetiletindigi arqasynda osynshama adam medısınalyq kómek alǵan. Al solardyń arasynda energetıkalyq sýsynnyń saldarynan sondaı kúıge túskenderi de barshylyq. Aıtalyq, Jezqazǵan qalasynda sergitkishti shamadan tys paıdalanǵan 30 jastaǵy azamat qant dıabetine ushyraǵan, halyqqa taksı qyzmetin usynyp júrgen taǵy bir azamat osy sýsynnyń kesirinen tıreotoksıkalyq zob dertine shaldyǵyp, múgedek bolyp qalǵan. Jalpy, bıyldyqqa sergımin dep sýsyn iship, sonyń saldarynan densaýlyǵy nasharlaǵan 8 azamatqa ártúrli deńgeıdegi medısınalyq kómek kórsetilgen eken.
Sergitkish janyńdy sergitpeıdi, kerisinshe sergeldeńge salady. Buǵan joǵarydaǵy oqıǵalar dálel. Endeshe, kimge bolsa da sergek oımen «Sergitkish sýsyn kerek pe?» dep oılanyp kórgenniń esh artyǵy bolmaıtyn tárizdi. Qudaı da saqtanǵandy ǵana saqtaıdy.
Jezqazǵan