Lırıkalyq ánderimen talaı júrekti terbegen kompozıtor Mels О́zbekovtiń shyǵarmashylyq murasy máńgi ólmesi anyq. Áıgili «Gaýhartas» fılminde shyrqalǵan «Kelshi, aıym» ánin qazirgi kezde túrli daýystaǵy ánshiler oryndap júr. Odan bólek «Kelshi, Qulanǵa» áni týǵan jeri qulandyqtardyń Gımnine aınalyp ketken.
Birshama ýaqyt buryn belgili kompozıtordyń óshpes murasy tasqa basylyp, «Melstiń mýzasy» atty jańa jınaq jaryq kórgen bolatyn. О́ner ıesiniń shyǵarmashylyǵyna arnalǵan, zamandastarynyń estelikteri jınaqtalǵan jańa kitaptyń tanystyrylymy ádebı-sazdy keshke ulasty. Is-sharany Mels О́zbekovtiń rýhanı inisi, kompozıtor Dúısenáli Byqybaev júrgizip otyrdy.
Shoqan Ýálıhanov atyndaǵy oblystyq ámbebap-ǵylymı kitaphanada ótken is-shara barysynda oblystyq ardagerler keńesiniń tóraǵasy Erkinbek Soltybaev qazaq óneriniń tórinen oıyp turyp oryn alǵan Mels murasyn jańa býynnyń jadynda jańǵyrtýdyń mańyzdylyǵyn atap ótti. Aqyn Shyryn Mamaserikova, «Jańarý» respýblıkalyq qoǵamdyq birlestigi oblystyq fılıalynyń jetekshisi Qasymhan Tólendıev estelikterimen bólisti.
Bul kúni Kenen Ázirbaev atyndaǵy oblystyq fılarmonııanyń ánshileri Melstiń birneshe ánin naqyshyna keltire shyrqasa, mádenıet salasynyń úzdigi Ońal Azamatova Dúısenáli Byqybaevtyń ánine, Arǵynbaı Bekbosynnyń sózine jazylǵan «Melsti ańsaý» ánin oryndap, jınalǵan jurttyń janaryna jas úıirdi.
Keıinnen Melstiń jerles inileri men baýyrlary is-sharaǵa arnaıy qatysqan mártebeli meımandardyń ıyǵyna shapan jaýyp, qurmet kórsetti. Olardyń qatarynda eki myńynshy jyldary Turar Rysqulov aýdanynyń tizginin ustaǵan kezde ıdeologııa jónindegi orynbasary Dúısenáli Byqybaevtyń usynysy negizinde aýdandyq mádenıet úıine Mels О́zbekovtiń esimin berýge yqpal etken Qasymhan Tólendıev te bar.
TARAZ