Qysqamerzimdi kásiptik oqytý arqyly mamandyqty aýystyrýǵa bolady. Qaraǵandy oblysynda 571 adam kásiptik bilim alýǵa jiberilgen. Onyń kópshiligi jańa mamandyqtyń qyr-syryn meńgerip, jumysqa da ornalasqan.
Búgingi tańda kásiptik oqýdy 435 maman aıaqtap, 317-si jumysqa ornalastyryldy. Oqý kezinde memleketten 32 685 teńge kóleminde shákirtaqy alady jáne jolaqysy tólenedi. «О́ńirimizde kásiporyndar bazasynda ornalasqan 20 oqý ortalyǵy bar. Olar tiginshi, aspaz, kondıter sııaqty suranysqa ıe mamandyqtar boıynsha mamandar daıyndaıdy», deıdi oblystaǵy eńbek utqyrlyǵy ortalyǵynyń dırektory Dáýren Qoshqaralıev.
Saran qalasyndaǵy «A.V.Group» kompanııasynda osy joba aıasynda eńbekke aralasqandar sany kóp. Atalǵan kompanııa 2013 jyly qurylǵan bolatyn. Bıyl 10 jyldyǵyn atap ótti. Kásiporyn tek jeńil ónerkásippen shektelip qalmaı, birneshe óndiristi damytyp otyr. Aımaǵymyzda alǵashqylardyń biri bolyp polıgrafııalyq óndiristiń tolyq sıklin qurǵan. Aldaǵy josparlary da aýqymdy. Qazaq tilinde Braıl shrıftimen túrli dúnıeler basyp shyǵarýmen aınalysatyn elimizdegi jalǵyz kásiporyn atanbaq. Jobasy ázir. Kelesi jyly iske qospaq nıette. Buǵan qosa, jol belgilerin jasaıtyn seh ta bar. Kompanııa jıhaz óndirýmen de aınalysady, arnaıy kıimder men tutyný taýarlaryn shyǵarady. Qazirgi tańda kásiporyndarynda 150 adam jumys isteıdi.
– Kásiporyndaǵy 70 adam bizdiń oqý ortalyǵynyń bazasynda qysqamerzimdi kásiptik oqýdan ótti. Saran qalasynyń mansap ortalyǵymen tyǵyz baılanystamyz. Olar bizge jumyssyzdardy jiberedi. Biz olardy 3 aıdan 6 aıǵa deıin oqytamyz, sodan keıin jumys ornyn usynamyz. О́zimiz úshin mamandar daıyndaımyz, sondyqtan olardyń biliktiligine senimdimiz. Bolashaqta osy baǵdarlama boıynsha taǵy 200-ge jýyq adamdy jumysqa ornalastyrýǵa daıynbyz. Sondaı-aq biz arnaıy kıimnen alystap, kópshilik tutynatyn kıim tigýmen de aınalysqymyz keledi, – deıdi «A.V.Group» JShS bas dırektory Vladımır Aleskerov.
Saran qalasynyń turǵyny Elmıra Volkova uzaq jyl mektepte ınformatıka páninen sabaq bergen. Bir jyl buryn mamandyǵyn aýystyrǵysy kelip, qysqamerzimdi kýrstarǵa tirkelgen.
– Jumyspen qamtý ortalyǵyna júgindim, maǵan «A.V.Group» seriktestiginiń oqý ortalyǵynyń bazasynda túpteýshige oqýdy usyndy. Úsh aı oqydym, tájirıbeden de óttim, sodan keıin jumys isteımin dep sheshtim. Kýrstar kezinde stıpendııa aldym. Qysqamerzimdi kásiptik oqytý baǵdarlamasy – jańa mamandyqty tez meńgergisi keletinder úshin jaqsy múmkindik. О́ıtkeni bilim tolyqqandy beriledi. Qazir meniń súıikti isim bar, bloknot jáne de basqa da keńse ónimderin jasaımyn. Sonymen qatar jumys ornym dál úıimniń janynda, – deıdi Elmıra.
Qysqamerzimdi kásiptik oqytý baǵdarlamasynyń túlekteri jańa mamandyqty ıgerip, kepildi jumysqa ornalasyp qana qoımaı, memlekettik úlgidegi sertıfıkattardy da alady. Sonymen qatar keıbir kýrstardy onlaın oqýǵa da bolady. Olardyń tizimi enbek.kz saıtynda kórsetilgen.
Qaraǵandy oblysy,
Saran qalasy