Bárine kináli qabyrshaq muz

«Atyraý oblysy sý arnasy» KMK-nyń baspasóz qyzmetinen málim etkendeı, buǵan Jaıyq ózeninde qabyrshaq muz qatyp, sý soratyn stansalardyń jumysyna kedergi keltirgen. Sol sebepten, 9 jeltoqsanda jergilikti ýa­qyt­pen saǵat 23:30 shamasynda sý berý toq­tatylǵan.

«Aýa raıynyń kúrt salqyn­da­ýynan Jaıyq ózeninde muz qatyp, aǵys jyldamdyǵy tómen­de­di. Osyǵan baılanysty Atyraý qalasynyń sý tazartý keshenine sý berý toqtatyldy. Al 10 jel­toq­san­da tańǵy saǵat 4:30-da qa­ladaǵy jelilerge tótenshe jaǵdaılardy boldyrmaý úshin tómen qysymmen sý berildi. «Atyraý-Maqat» magıs­traldyq qubyrymen, onyń ishinde «Bereke» shaǵyn aýdanyndaǵy toǵyz qabatty úılerge, Kóktem, Juldyz-3, Teńdik, Aqsaı-1, Aqsaı-2 shaǵyn aýdandaryna tehnıkalyq sebepterge baılanysty sý jibe­ril­medi», dep aqparat taratty kásip­oryn­nyń baspasóz qyzmetinen.

Sýsyz otyrý kimge ońaı deısiz? Áleýmettik jelidegi paraqshalar men WhatsApp messendjerindegi chattar turǵyndardyń renishin bildirgen pikirine toldy. El-jurt­tyń bazynasy qalalyq, ob­lys­tyq ákimdikterge jetkeni daý­syz. Oblys ákimdiginde qalyp­tas­qan jaǵdaıǵa baılanysty arnaıy komıssııa quryldy. Komıs­sııa­ǵa jetekshilik etken oblys áki­miniń orynbasary Qaırat Nurtaev pen Atyraý qalasynyń ákiminiń Shákir Keıkın Jaıyq ózeninen sý soratyn, tazalaıtyn stansalardyń jumysyn qalpyna keltirýdi qadaǵalady.

Biraq máseleniń oń sheshimi ońaı­lyqpen tabyla qoıǵan joq. О́ıtkeni 10 jeltoqsanda jergilikti ýaqytpen saǵat 15:00-ge deıin eki sý tazartý qondyrǵysy muzdan tazartylyp, iske qosylǵan. Sol kezde súńgýirler úshinshi sý tazartý qondyrǵysyn muzdan tazalaýdy jalǵastyryp jatty. Aýa raıynyń qubylysyn qalt jibermeıtin «Qazgıdromet» RMK Atyraý oblystyq fılıalynyń málimetine súıensek, sońǵy aptada shyǵystan ekpindi jel soǵyp, Kaspıı teńiziniń deńgeıi 40 sm-ge tómendegen. Bul Jaıyq ózeninde de sý deńgeıiniń tómendeýine áser etken.

Al «Atyraý oblysy sý arnasy» KMK sý tazartý qon­dyr­ǵylarynyń basshysy Borıs Penkınniń aıtýynsha, Jaıyq ózeninde qabyrshaq muzdyń tyǵyz massasy paıda bolǵan. Mun­daı qubylys shamamen 20 jyl­dan beri baıqal­ma­ǵan.

«Bıyl, tipti sońǵy aptada Ja­ıyq ózenindegi sý deńgeıiniń kúrt tómendegeni baıqaldy. Má­se­len, 9 jeltoqsanda keshki bir­neshe saǵatta sý deńgeıi 15-20 sm-ge tó­men­dedi. Kún kúrt sýytyp, ózen be­tin­degi usaq muz krıstaly sý jı­naıtyn jabdyqqa ornatylǵan qorǵanys torlaryn bitep tastady», dep málim etti Borıs Penkın.

Mamandar qabyrshaq muz ózen­nen sý alýǵa kedergi kel­tire­tin birneshe sebepti týyn­da­ta­tynyn alǵa tartyp otyr. Birin­shiden, sý jınaıtyn qu­ry­ǵy­lar bite­ledi. О́ıt­ke­ni usaq muz krıs­taly balyq qorǵaý torlaryn, sý jınaıtyn jabdyqtyń basqa ele­mentterin bitep tastaýy múm­kin. Bul sý jınaýdyń tıim­di­li­gin tómen­detedi.

Ekinshiden, jabdyqtyń bu­zylýyna yqpal etedi. О́zendegi sý aǵy­symen qabyrshaq muz jeńil qozǵalady. Ásirese muz krıstaldary úlken bolsa, nemese tyǵyz jınaqtalsa, sý alatyn jabdyqqa mehanıkalyq zaqym kel­tiredi.

Úshinshiden, mundaı faktorlar sý sapasyn tómendetedi. Muzben birge ártúrli lastaýshy zattar júrýi múmkin.

Tórtinshiden, sý aǵysyna ke­der­gi keltiredi. Keıbir jaǵ­daı­da qabyrshaqty muz sýdyń qalypty aǵy­syna kedergi keltiretin tyǵyz klas­terler túzýi múmkin. Al bul sý jınaıtyn qurylǵylardyń tıimdiligine keri áser etedi.

Bul sebepterdiń qanshalyqty áseri etkeni belgisiz, 10 jel­toq­sanda keshke deıin sýmen qamtý máselesi ýshyǵyp turdy. «Aty­raý oblysy sý arnasy» kom­mý­nal­dyq memlekettik kásipor­nynyń basshysy Meıirim Qalaýı­diń aıtýynsha, sol kúni jer­­gilikti ýaqytpen saǵat 16:00 shamasynda tutynýshylarǵa sý berile bastaǵan. Al saǵat 19:00-de qubyrdaǵy qysymdy qalpyna keltirý aıaqtalǵan.

«Sý tazartý qondyrǵylaryn jóndeý, tazartý jumystary 9 jeltoqsan kúni keshke bastaldy. Kásiporynnyń jumysshylary men arnaıy mekemeniń súńgýir­leri aýa raıynyń qolaı­syz­dy­ǵy­na qaramastan úzilissiz jumys istedi. Olar barlyq sý tazartý qon­dyr­ǵy­syn muzdan tolyq tazartty. Qazir kásiporynnyń sý tartý qurylǵylary shtattyq rejimde jumys istep tur. Sýdyń quramy tazarǵan saıyn qubyr­daǵy qysym artady», deıdi M.Qalaýı.

Atyraý oblysy