Aqtaýdaǵy balabaqshalardyń birinde kishkentaı qyzdy soqqyǵa jyqqan tárbıeshi tergeýge alyndy, dep habarlaıdy Egemen.kz.
Lada.kz basylymy habarlaǵandaı, qyzdyń anasy polısııaǵa aryzdanǵan. Onyń aıtýynsha, balabaqsha tárbıeshisi balaǵa qol kótergen. Qyzdyń anasy balanyń denesinde de kógergen izder baıqalǵanyn aıtty.
Oqıǵanyń mán-jaıyn anyqtaý úshin balabaqshada ornatylǵan beınebaqylaý kamerasyna jazylǵan materıaldar zertteldi. Beınejazbaǵa qaraǵanda, tárbıeshi balalardy uıyqtatyp jatqan. Kenetten ol bir balany jatqan jerinen julqyp alyp, betinen uryp, jastyqqa laqtyryp jibergen. «Bul fakti QR Qylmystyq kodeksiniń 140-babynyń 2-bóligi (Kámeletke tolmaǵan balany tárbıeleý jónindegi mindetterdi oryndamaý) boıynsha Sotqa deıingi tergep-tekserýdiń biryńǵaı tizilimine tirkeldi, 30 jastaǵy tárbıeshi tergeldi. Tergeý múddesine sáıkes ózge aqparat jarııalanbaıdy», dep túsindirdi polısııa qyzmetkerleri.