Elimizde qala kóshelerinde samokat aıdaýshylardyń jol erejesin buzyp, kólik apattaryna sebep bolýyna baılanysty bıyldan bastap olarǵa júrgizýshi kýáligin alý mindettelgen bolatyn. Kýálikti alý úshin qaıda barý kerek?
Bul suraqqa IIM M.Esbolatov atyndaǵy Almaty akademııasy Jedel-izdestirý taktıkasy jáne arnaıy tehnıka kafedrasy bastyǵynyń orynbasary, zań ǵylymdarynyń kandıdaty, polısııa polkovnıgi Tamara Qorjymbaeva jaýap beredi.
– Ishki ister mınıstriniń jol júrisi qaǵıdalaryn, kólik quraldaryn paıdalanýǵa ruqsat berý jónindegi negizgi erejelerdi bekitý týraly 2023 jylǵy 30 maýsymdaǵy №534 buıryǵyna sáıkes joldyń júrý bóliginiń oń jaq shetimen, onyń ishinde marshrýttyq kólik quraldaryna arnalǵan jolaqpen júrý maqsatynda samokat júrgizýshileri úshin 18 jasqa tolýy jáne kez kelgen sanattaǵy kólik quralyn basqarý quqyǵyna arnalǵan júrgizýshi kýáliginiń bolýy mindetti jáne joldyń júrý bóliginde basqarýy kezinde túımelengen shlemsiz aıdaýyna tyıym salynady.
2014 jylǵy 17 sáýirdegi Jol júrisi týraly zańǵa sáıkes alǵashqy kólik júrgizý sanattaryn 16 jáne 18 jastan bastap alýǵa bolady. Júrgizýshi kýáligin alý úrdisin shartty túrde mynadaı kezeńderge bólýge bolady:
- kólik quraldaryn júrgizýshilerdi daıarlaý ortalyǵyn oqyp, aıaqtaǵany týraly kýálik alý;
- medısınalyq tekseristen ótý;
- emtıhan tapsyrý;
- qujattardy tapsyrý jáne júrgizýshi kýáligin alý.
Júrgizýshi kýáligin alý úshin memlekettik bajdyń quny 1,25 AEK quraıdy.