Jastardyń jasampaz jobalary

Sala mamandary men sarap­shylarynan quralǵan komıssııa jobalardy 5 baǵyt bo­ıynsha iriktegen. Ár jobaǵa 500 myń teńge bólingen. Mun­daǵy basty maqsat – bel­sen­di shyǵarmashyl jastar qaýym­dastyǵyn qalyptastyrý úshin aımaqtaǵy 14-ten 35-ke deıingi azamattardyń jańa jáne qolda­nystaǵy bastamalaryn memleket tarapynan qoldaý. Ilkimdi istiń ıgiligin kórgen jastyń biri – Qýat Janeseev.

– Men – Inder aýdanyna­ qarasty Eltaı aýylynyń turǵynymyn. «Táýelsizdik urpaq­tary» granty týraly áleý­mettik jeliden baıqap, ózimniń baǵymdy synap kór­gen edim. Qatysqan 50 adamnyń ishinen sýyrylyp shyǵyp, grant ıegeri atandym. Usynǵan jobam «Baqytty balalyq shaq» dep atalady. Múmkindigi shekteýli jandar úıden kóp shyǵa bermeıdi. Oǵan sebep kóp. Biri jurttyń kózqarasynan ımense, endi biri qoǵamdyq oryndardyń erekshe jandarǵa yńǵaılanyp jasalmaǵandyǵynan shyǵa almaıdy. Olarǵa erkin serýen­deı­tin oryn jasap, al qal­ǵan balalarǵa muz aıdynyn ashqym keledi. Granttan tús­ken qarajatqa kerek qural-jab­­dyqtardy alyp, kási­bim­di damytsam deımin. Al Inder aýdanyna qarasty múmkindigi shekteýli, erekshe balasy bar ata-analarǵa jáne kóp­­balaly otbasylarǵa arnaıy konkılerdi tegin beremin, – dedi kásipker.

Qýattan ózge, grant ıele­nip, jobasy úzdik dep tanyl­ǵandar qatarynda Aıkórkem Satymova («Aqyldy bala»), Dılnaz Islıamova («Tigin sheberhanasyn ashý»), Shuǵa Jeksemalıeva («Birge»), Nurkórkem Ǵabıt («NUR Cake»), Aınur Nurymbetova («Úzdiksiz qýat kózi»), Aqtilek Bısembaı («Álemdi qazaqsha tany»), Nursultan Nurǵalıev («Qurylys jabdyqtary men quraldaryn jalǵa berý»), Baqdaýlet О́mirtaev («3D Engineering»), Ǵıbadat Myńbaı («Antıbýllıng») bar.

Baıqaýǵa úmitkerlerdiń ótinish­teri 30 qarashaǵa deıin qabyldanǵan. Uıymdas­ty­rý­shylardyń sózinshe, jas­tar­dyń kásippen aınalysýyna múmkindik beretin mundaı ıgi bastama keler jyly da jalǵasyn tabady.

– «Táýelsizdik urpaqtary» granty Atyraý qalasynda bıyl alǵash ret bastaý aldy. Baıqaýda ǵylymnyń basym sektorlarynda jańa ǵylymı jobalardy jáne zertteýlerdi iske asyrýǵa arnalǵan «Ǵylym», elimizdiń mádenı murasyn tanymal etýge, halyqtyq mádenı dástúrler men ónerdi ilgeriletýge baǵyttalǵan jobalardy iske asyrýǵa arnalǵan «Mádenıet», jańa IT sheshimder men jobalardy, onyń ishinde jańadan bastalǵan startap jobalardy iske asyrýǵa jáne ázirleýge arnalǵan «Aqpa­rat­tyq tehnologııalar», ekono­mıkanyń basym sektorlarynda jańa bıznes-ıdeıalardy iske asyrýǵa arnalǵan «Bıznes», jańa medıa jobalardy, onyń ishinde jastar úshin tanymdyq, paıdaly, qyzyqty kontent qurý jónindegi jobalardy iske asyrýǵa arnalǵan «Medıa» baǵyty boldy. Aldaǵy ýaqytta bul jobalardy utyp alǵan qatysýshylardy ózimiz qadaǵalaımyz. Osy jobany jyldyń aıaǵyna deıin bastaý­laryna múmkinshilikteri bar. Búginde bizde «Táýelsizdik urpaqtarynan» bólek «Seniń bastamań» syndy basqa da jaqsy jobalar bar. Aldaǵy ýaqytta osyndaı is-sharalar qataryn tolyqtyrý josparlanyp otyr, – dedi qalalyq jastar resýrstyq ortalyǵy basshysynyń mindetin atqa­rý­shy Eldar Tóremuratov.

Aıta keteıik «Táýelsizdik urpaqtary» arnaıy granty 2021 jyly Táýelsizdigimizdiń 30 jyldyq mereıtoıy qar­sa­ńynda Memleket basshysy Qasym-Jomart Toqaevtyń bas­ta­masymen jastardyń jasampaz jobalaryn júzege asyrý maqsatynda taǵaıyndaldy.