QR Premer-mınıstri Álıhan Smaıylovtyń tóraǵalyǵymen ótken «Jasyl ekonomıkaǵa» kóshý jónindegi keńestiń otyrysynda jańartylatyn energııa salasyndaǵy jańa jobalardy qoldaý máseleleri talqylandy, dep habarlaıdy Egemen.kz Úkimettiń baspasóz qyzmetine silteme jasap.
QR Qarjy naryǵyn retteý jáne damytý agenttiginiń tóraǵasy Mádına Ábilqasymova atap ótkendeı, búgingi tańda elimizde «jasyl» qarjylandyrýdy damytý maqsatynda qajetti zańnamalyq jáne normatıvtik-quqyqtyq baza quryldy. Jańa Ekologııalyq kodeks qabyldanyp, «jasyl» oblıgasııalar men ESG oblıgasııalaryn shyǵarý men aınalymǵa engizý úshin ózgerister qabyldandy. «Astana» halyqaralyq qarjy ortalyǵy men KASE bırjalarynda ESG aqparatyn ashý erejeleri bekitildi. Birqatar basqa da sharalar júzege asyryldy.
Júrgizilgen jumystyń arqasynda elimizde turaqty qarjylandyrý kóleminiń oń serpini baıqalady. Bıylǵy 1 qarashada KASE-de korporatıvtik qaryz alý kólemi 2021 jylmen salystyrǵanda 4 eseden astam artyp, shamamen 208 mlrd teńgeni qurady. Bank sektoryndaǵy «jasyl» nesıelendirý kólemi 3,5 eseden astam ósip, 220 mlrd teńgeni qurap otyr.
1 jeltoqsandaǵy jaǵdaı boıynsha «Báıterek» holdıngi tarapynan «jasyl» jobalardy tikeleı qoldaýdyń jalpy kólemi 177,5 mlrd teńgeni qurady. Atap aıtqanda, Qazaqstannyń Damý banki jańartylatyn energııa kózderi salasyndaǵy quny 118 mlrd teńge bolatyn iri 7 ınvestısııalyq jobaǵa qoldaý kórsetti. «Qazaqstan Investment Corporation» AQ 11,1 mlrd teńgege birqatar jobalarǵa (kún jáne sý elektr stansalary qurylysy) qoldaý kórsetti. Taǵy bir enshiles uıym «Damý» qory 7,4 mlrd teńgeniń 91 «jasyl» jobasyn qoldady.
Sonymen qatar 2018 jyldan beri «О́nerkásipti damytý qory» AQ otandyq avtoóndirýshilerdi qoldaý sheńberinde avtobýs parkin jańartý boıynsha lızıngtik qarjylandyrýdy júzege asyrady. Atap aıtqanda, qazirdiń ózinde Astanada elektrmen júretin 120 qalalyq avtobýs jáne Pavlodarda 10 avtobýs satyp alý qarjylandyryldy. Tozyǵy jetken kólikterdi ekologııalyq taza kólik túrlerine aýystyrý kezeń-kezeńimen jalǵasatyn bolady.
Sondaı-aq «Agrarlyq nesıe korporasııasy» AQ jelisi arqyly birinshi jartyjyldyqta sýarý júıelerin jáne ónimdi baý-baqshalar qurý sııaqty salalarǵa baǵyttalǵan jalpy quny 2 mlrd teńgeden asatyn 15 «jasyl» jobaǵa qoldaý kórsetildi.
Premer-mınıstr ekonomıkanyń aýqymdy transformasııasy «jasyl» ınvestısııalar kólemin arttyrýdy talap etetinin atap ótti.
«2060 jylǵa deıin kómirtegi beıtaraptyǵyna qol jetkizý úshin $600 mlrd-tan astam kóleminde qarjy qajet, sondyqtan «jasyl» tehnologııalarǵa ınvestısııa tartý boıynsha jumysty kúsheıtý kerek», dedi Álıhan Smaıylov.
Osyǵan oraı Premer-mınıstr «jasyl» jobalardy iske asyrý barysynda kezdesetin kedergilerge taldaý júrgizýdi, «jasyl» qarjylandyrý týraly aqparatty mindetti túrde jarııa etý jónindegi talaptardy iske asyrýdy jedeldetýdi, sondaı-aq «Jasyl ekonomıkaǵa» kóshý jónindegi tujyrymdamanyń is-qımyl josparynda tıisti ındıkatorlar men is-sharalardy qarastyrýdy tapsyrdy.