1973 jyly halyq batyry Amangeldi Imanovtyń 100 jyldyǵyna oraı ashylǵan Arqalyqtaǵy «Dala aımaǵynyń tarıhy» oblystyq murajaıy ózi jumys istep turǵan jarty ǵasyrlyq kezeń ishinde óńir tarıhynyń altyn sandyǵy ispettes rýhanı-mádenı qazynanyń ortalyǵyna aınaldy.
Murajaı ǵımaraty osydan birneshe jyl buryn jóndeýden ótken. Bıyl mýzeı ekspozısııasyn qaıta jańǵyrtý jumystary júrip jatyr.
«Qazir mýzeıdiń ekinshi jáne úshinshi qabatyndaǵy ekspozısııalardy qaıta quryp jatyrmyz. Bul ekspozısııalarda adamzat dáýiriniń alǵashqy kezeńderinen bastap, qazirgi kezeńge deıingi aralyqtaǵy Qostanaı, Torǵaı óńirine qatysty tarıhı derekter hronologııalyq júıe boıynsha qamtylyp otyr. Mýzeı qoryn tolyqtyryp jatqan jańa materıaldar bar. Mysaly, keıingi jyldary ashylǵan Torǵaı geoglıfterine qatysty derekter qoıylyp jatyr. Osydan biraz jyl buryn mesenat Sapar Ysqaqovtyń qoldaýymen Torǵaı óńirinde arheologııalyq qazba jumystary júrgizilgen. Odan keıin Ulttyq mýzeıdegi Halyq qazynasy ınstıtýty birneshe jyldyq grant utyp alyp, arheologııalyq zertteý jumystaryn ári qaraı ilgeriletken. Sol jumystardyń nátıjesinde tórt qorǵannan tabylǵan úsh saba, taǵy basqa da jádigerler murajaı ekspozısııasynan oryn aldy. Sonymen qatar keıingi kezde tabylǵan Balǵoja bıdiń sýreti, Shegenniń Qazbeginiń sýreti, Ahmetsapa Iýsýpovtyń óz qolymen jazylǵan ǵumyrbaıany sekildi qundy-qundy dúnıeler, osy ólkeniń tarıhyn jasaýǵa úles qosqan tulǵalardyń portretteri, qujat kóshirmeleri murajaı qoryn tolyqtyryp otyr», deıdi mýzeı qyzmetkeri, aqyn Batyrlan Saǵyntaev.
Mýzeı qorynda qazir 76 myńnan asa jádiger saqtaýly tur. Olardyń ishinde Ábilhan Qasteev salǵan Amangeldiniń portreti, Amangeldiniń qanjary, Keıki batyrdyń úıine tıesili kebeje, sarmat dáýirine jatatyn kúmisten jasalǵan at ábzeliniń bir bóligi sekildi qundy jádigerler bar.
Qostanaı oblysy