Mádenıet jáne aqparat mınıstrliginiń qoldaýymen bıyl ekinshi ret uıymdastyrylǵan respýblıkalyq «Aıboz» ulttyq ádebı syılyǵynyń qorytyndysy jarııalandy. Jeńimpazdardy marapattaý rásimi Almatydaǵy Qurmanǵazy atyndaǵy Qazaq ulttyq halyq aspaptar orkestri ǵımaratynda ótti.
Otandyq qalamgerlerdi memleket tarapynan yntalandyrý, jańa qazaq ádebıetine súbeli de súıekti shyǵarmalardyń molynan qosylýyna yqpal etý maqsatynda uıymdastyrylǵan «Aıboz» ulttyq ádebı syılyǵy – Mádenıet jáne aqparat mınıstrliginiń tikeleı uıytqy bolýymen qolǵa alynǵan biregeı joba. Ulttyq baıqaýdyń maqsaty – qalamgerler men baspagerlerge memleket tarapynan jan-jaqty qoldaý kórsetý, qazaq ádebıetiniń tuǵyryn nyqtap, jańa beleske kóterilýine jaǵdaı jasaý, qalamgerlerdiń eńbegin nasıhattap, baǵyt-baǵdar berý jáne olardyń shyǵarmashylyq jumystarynyń jaryq kórýine yqpal etý.
Ádebı ortany ǵana emes, tutas qoǵamdaǵy rýhanııat janashyrlaryn eleńdetken bıylǵy baıqaýǵa barlyq janr boıynsha 300-den asa ótinim qabyldanǵan. Bul – qazaq ádebıetiniń qanjyǵasy 300 jańa týyndymen tolyǵady degen sóz. Degenmen bul byltyrǵy kórsetkishpen salystyrǵanda, júz shyǵarmaǵa az. Baıqaý talabyna sáıkes shyǵarmalar buryn-sońdy esh jerde jarııalanbaýǵa tıis jáne sońǵy sátke deıin úmitker avtorlardyń aty-jóni qupııa ustaldy. Baıqaýǵa tórelik jasaǵan qazylar alqasy jabyq formatta jumys istep, avtory beımálim, jumbaq shyǵarmalardy saraptaǵan.
«Aıboz» ulttyq ádebı syılyǵy 7 atalym boıynsha ótkizildi. Olar – «Úzdik proza», «Úzdik poezııa», «Úzdik balalar ádebıeti», «Úzdik dramatýrgııa», «Úzdik ádebı aýdarma», «Úzdik ádebı syn» jáne «Úzdik komıks» atalymdary. Ár atalym boıynsha úzdik atanǵan jeńimpazǵa 5 mıllıon teńge syıaqy taǵaıyndaldy.
«Bıyl Ulttyq quryltaıda Memleket basshysy Q.Toqaev qalamgerlerdi qoldaýǵa baılanysty naqty tapsyrmalar júktegen edi. Kúni keshe ǵana qalamgerlerimizdiń 24 kitabynyń tusaýkeseri ótti. Kitap – adamnyń dosy, baılyǵy. Tól ádebıetimizdi sony dúnıelermen tolyqtyratyn mundaı ıgi bastamalardyń rýhanııatqa, keleshek jastarǵa bereri mol», dedi Mádenıet jáne aqparat vıse-mınıstri Arman Júdebaev.
Ol kitap isi salasyndaǵy keıbir máselelerge nazar aýdaryp, balalar ádebıetine basymyraq kóńil bólý keregin aıtqan Prezıdent tapsyrmasyna oraı bul tarapta naqty qadamdar jasalyp jatqanyn jetkizdi. «Aıboz» ulttyq ádebı syılyǵyn tapsyrý saltanaty alǵashqy jeńimpazdyń esimin «Úzdik balalar ádebıeti» atalymynan izdep, anyqtaýdan bastaý aldy. Short-lıstke engen shyǵarmalar ishinen «Konsert» týyndysymen belgili jazýshy Serik Asylbekuly jeńimpaz dep tanyldy. «Úzdik dramatýrgııa» atalymy boıynsha «Adam ata, Haýa ana» shyǵarmasymen Israıl Saparbaı top ishinen oza shaýyp, dara keldi. 106 shyǵarmanyń ishinde «Anamnyń qurbysy» povesimen top jarǵan jazýshy Qýandyq Túmenbaı «Úzdik proza» avtory atandy. «Kózimnen súı, kóbelek» óleńimen aqyn Janat Jańqashuly «Aıboz» syılyǵynyń eń mańyzdy atalymdarynyń biri «Úzdik poezııa» jeńimpazy boldy. «Úzdik aýdarma» júldesi «Qasqyrlar qupııasy» shyǵarmasymen Abaı Maýqaraǵa tabystaldy. «Úzdik ádebı syn» «Abaı hám Nısshe ilimindegi Qudaı, adam jáne avtor máselesi: úsh sýper maǵynanyń kúıreýi» atty ádebı taldaýy joǵary baǵalanǵan belgili jazýshy Dıdar Amantaı óz toby ishinde júldeger atandy. Al «Úzdik komıks» atalymynyń júldesi belgili anımator rejısser Sálimǵalı Myrzashevqa berildi.
Qalamgerlerdiń arasyndaǵy ádil básekeni nyǵaıtyp, oqyrmanǵa ózekti, qyzyq ári zamanaýı shyǵarmalar usynýdy dittegen baıqaý jeńimpazdarynyń shyǵarmalary baspa betinen jaryq kórip, kitaphanalarǵa taratylady.
ALMATY