Oqý-aǵartý mınıstrligi úsh aýysymdy, apatty mektepterdiń máselelerin, sondaı-aq oqýshylar ornynyń tapshylyǵyn júıeli sheshý úshin jańa bilim berý nysandaryn iske qosý boıynsha josparly jumys júrgizilip jatyr, dep habarlaıdy Egemen.kz oqý-aǵartý mınıstrliginiń baspasóz qyzmetine silteme jasap.
«16 jeltoqsan qarsańynda elimizde 7344 oryndyq 13 jańa mektep ashylady. Osylaısha, bıylǵy jyldyń basynan beri paıdalanýǵa beriletin 95 344 oryndyq jańa mektepterdiń sany 109-dy quraıdy», dep jazylǵan habarlamada.
Jalpy, osy jyldyń aıaǵyna deıin túrli qarjy kózderi esebinen 132 myń oqýshy orynǵa arnalǵan 154 mektepti, onyń ishinde Bilim berý ınfraqurylymyn qoldaý qory esebinen 76 738 oryndyq 62 mektepti paıdalanýǵa berý josparlanyp otyr. Bul 12 apatty jáne 29 úsh aýysymdy mekteptiń máselesin, 113 eldi mekendegi oqýshy oryndarynyń tapshylyǵyn sheshedi.
Sondaı-aq «Jaıly mektep» ulttyq jobasy iske asyp jatyr. Bıyl 217 mekteptiń qurylysy bastaldy, olar 2024 jyldyń sońyna deıin paıdalanýǵa beriledi. Ulttyq joba eń aldymen qalalar men keleshegi bar eldi mekenderde jańa úlgidegi mektepterdi salýǵa, oqýshylar men pedagogterge jaıly ári qaýipsiz orta qalyptastyrýǵa, bilim berý qyzmetiniń sapasyn arttyrýǵa baǵyttalǵan. Jalpy, Memleket basshysynyń tapsyrmasy boıynsha elimizde 740 myń oqýshyǵa arnalǵan 369 jaıly mektep salý josparlanyp jatyr.