Túrkistan oblysynda Ordabasylyq sharýa jyl on eki aı qulpynaı ósirip otyr. Qystyń kózi qyraýda da egin men jıyn-terimdi toqtatpaıtyn Muhtar Áleýhanov qysta naryqqa shyqqan kókónis, jemister «dárilengen» degen túsinikten arylatyn kez jetti deıdi. Sebebi sharýa oblystaǵy jylyjaı ıeleri kez kelgen jemisti qysta da ósirýge daǵdylanǵanyn aıtty, dep jazady Egemen.kz otyrar.kz-ke silteme jasap.
Muhtar Áleýhanov - «Nur-Aısha» sharýa qojalyǵyndaǵy sharýasyn 2016 jyly bastaǵan. Alǵashynda qyzanaq, qııar egetin ol, istiń qyr-syryn jetik meńgergennen keıin qulpynaı ósirýdi de qolǵa alǵan.
Sharýa qulpynaıdyń qysta ósýge beıim, sýyqqa tózimdi «Alba» sortyn egedi.
«Bul ónimge tutynýshylar tarapynan suranys joǵary. Ásirese mereke qarsańynda kondıter ónimin óndiretinder tarapynan tapsyrys kóp. Osydan 10-15 jyl buryn qys mezgilinde pisken qyzanaq pen qııardyń baǵasy qymbat bolatyn. Ári olardy kóp ege almaýshy edi. О́ıtkeni, tutynýshylar «tek dárimen pisken» dep satyp ala bermeıtin. Qazir kez kelgen kókónisti dárisiz-aq ósirýge bolatynyn bilemiz. Sondyqtan saqyldaǵan sary aıazda da kókónis jep otyratyndar bar», deıdi ol.
Jylyjaıda 20 adamdy jumyspen qamtyp otyrǵan Muhtar Áleýhanov qys aılarynda 1,5 gektar jerden 50-60 tonna qulpynaı ónimin alýdy josparlap otyr.