Májilis spıkeri Erlan Qoshanovtyń tóraǵalyǵymen Bıýro otyrysy ótip, aldaǵy jalpy otyrystyń kún tártibi naqtylandy.
Depýtattardyń talqylaýyna birinshi oqylymda ekologııalyq taza kólikti tanymal etý jáne elektromobılderge arnalǵan ınfraqurylymdy damytý máseleleri týraly zań jobasy usynylady.
Zań jobasy Májilis depýtattarynyń bastamasymen ázirlendi. Onda turǵyn úılerdi, bıznes ortalyqtardy, saýda-oıyn-saýyq ortalyqtaryn, qonaqúılerdi, qoǵamdyq tamaqtaný oryndaryn jáne basqa da nysandardy salý kezinde, jol boıynda, qoǵamdyq oryndarda, erekshe qorǵalatyn tabıǵı aýmaqtarda elektromobılderdi zarıadtaý qurylǵylary úshin jekelegen oryndardy belgileý qarastyrylǵan.
Sondaı-aq Májilistiń qaraýyna adamdardyń readmıssııasy týraly Qazaqstan-Estonııa úkimetaralyq kelisimin ratıfıkasııalaý týraly zań jobasy engiziledi.
Aldaǵy jalpy otyrysta Palata komıtetteri sybaılas jemqorlyqqa qarsy is-qımyl máselelerine qatysty jańa zań jobalaryn da jumysqa alady.
Sonymen qatar depýtattar Jekelegen aýdıtorlyq is-sharalardyń qorytyndylary boıynsha sý resýrstarynyń basqarylý tıimdiligin taldaý týraly Joǵary aýdıtorlyq palatanyń esebin tyndaıtyn bolady.