Qyzylordanyń dál irgesinde Naǵı Ilııasov atyndaǵy eldi meken bar. Ekinshi dúnıejúzilik soǵystan Býdapesht qalasyn azat etýdegi erligi úshin keńes odaǵynyń batyry atanyp qaıtqan qaharman osy aýyldyń tútinin túzý ushyrý úshin jan aıamaı eńbek etken. Osy kúni batyr esimin ıelengen aýyldyń turmysy qaladan birde-bir kem emes. Syrttan kelgen qonaqtar baıyrǵy jurttaǵy baıyrqaly tirlikti birden baıqaıdy.
Táýelsizdik merekesi qarsańynda oblys ákimi Nurlybek Nálibaev pen Syr óńirine arnaıy kelgen Parlament Májilisindegi «Amanat» partııasy fraksııasynyń jetekshisi Elnur Beısenbaev, Májilis depýtaty Marhabat Jaıymbetov Syrdarııa aýdanyndaǵy osy aýylǵa baryp, dárigerlik ambýlatorııanyń ashylý rásimine qatysty. Jańalyǵy kóp aýyldaǵy bul nysan Prezıdent tapsyrmasymen qolǵa alynǵan «Aýyldyq densaýlyq saqtaýdy jańǵyrtý» ulttyq jobasy aıasynda Syr óńirinde salynyp jatqan 27 medısınalyq nysannyń alǵashqysy ekendigin de aıta keteıik. Ulttyq joba aıasyndaǵy alǵashqy ambýlatorııa ǵımaratynyń aýdany – 860 sharshy metr.
– Memleket basshysynyń tapsyrmasymen elimizde densaýlyq saqtaý salasyna aıryqsha kóńil bólinip, medısınalyq qyzmettiń qoljetimdiligin qamtamasyz etý, ınfraqurylymdy jańǵyrtý baǵytynda kóp bastama qolǵa alyndy. Mysaly, «Aýyldyq densaýlyq saqtaýdy jańǵyrtý» ulttyq jobasy sheńberinde aımaq eldi mekenderinde 27 nysan salynyp jatyr. Saladaǵy osyndaı salmaqty bastamalar aldaǵy ýaqytta da óńir halqynyń ıgiligine aınala beredi dep senemiz, – dedi oblys basshysy.
Parlament Májilisindegi «Amanat» partııasy fraksııasynyń jetekshisi Elnur Beısenbaev aýyl turǵyndaryn jańa nysannyń ashylýymen quttyqtap, sala ardageri Turǵanbaı Mahanov bata berdi. Mereke qarsańyndaǵy saltanatta nysandy salǵan merdiger mekeme ókilderi jáne aýyldyń damýyna úles qosqan azamattar marapat ıelendi.
Jalpy, oblys bıýdjetiniń negizgi bóligi áleýmettik salaǵa baǵyttalyp keledi. Bıyl aımaq qazynasynyń qorjyny 57 paıyzǵa ósip, 609 mlrd teńgege jetti. О́ńir medısınasyna 138 mlrd 600 mln teńgeden astam qarjy qaralypty. Osy jyly Qyzylorda qalasynda 36 mlrd 400 mln teńgege bir aýysymda 100 kelýshige arnalǵan emhanasy jáne onkologııalyq bólimshesi bar 300 oryndyq kópbeıindi aýrýhananyń qurylysy bastaldy. Quny 2 mlrd 900 mln bolatyn Qan ortalyǵy jaqyn kúnderi qoldanysqa beriledi. Oǵan qosa 9 medısınalyq nysanǵa kúrdeli jóndeý júrgizilip, 5 nysannyń jylý júıesi gazǵa aýystyrylyp jatyr.
Jyl sońyna deıin kópbeıindi oblystyq aýrýhana janynan 70 tósektik perınataldyq ortalyq, qala irgesindegi Dosan eldi mekeninde medısınalyq beket, Jańaqorǵandaǵy kópbeıindi aýdandyq aýrýhanadan balalarǵa arnalǵan «Qamqorlyq» ońaltý ortalyǵy ashylmaq.
Qyzylorda oblysy