Almatydaǵy Memlekettik ortalyq mýzeıde «Jeltoqsan – Táýelsizdik jańǵyryǵy» atty kórme kópshilik nazaryna usynyldy. Murajaı qorynda Jeltoqsan kóterilisine qatysty 200-den astam jádiger saqtalǵan.
Kórmege qoıylǵan qundy eksponattar qatarynda 1986 jylǵy Brejnev alańynda ótken Jeltoqsan kóterilisine qatysýshy, KSRO halyq ártisi Á.Mámbetovtiń qanǵa boıalǵan kıimderi (pıdjak, jeıde jáne galstýk) birden kózge túsedi. Tanymal rejısser óz esteliginde: «1986 jyldyń 17 jeltoqsanynda keńes armııasy soldattary bizdi soqqyǵa jyǵyp, júk kóligine birneshe adamdy mińgestirip jatqanda, túbinde aqıqat anyqtalaryna sengenmin. Sol kún týdy», dep jazady.
Sondaı-aq kórmege Halyq jazýshysy Muhtar Maǵaýınniń jeke kolleksııasynan alynǵan temir armatýra soıyldar qoıylǵan. Bul týraly qalamger bylaısha baıandaıdy: «1986 jyly Jeltoqsan oqıǵasynan 10 shaqty kún ótkennen keıin alańǵa arnaıy bet aldym. Qalyń qar kúrelip, alańnyń shetine úıilgen eken. Áldebir tustan taıaqtyń ushy kórindi. Saqshylardyń kózin ala bere taıaqty sýyryp aldym. Keri qaıtyp keldim de, taǵy bir taıaqty arshyp aldym. Ekeýin de úıge ákelip, saqtap qoıyp edim». Jazýshy soıyldardy 2014 jyly mýzeı qoryna ótkizgen.
Kórmege kelýshiler nazaryna 17-18 jeltoqsan kúnderi dybysty kúsheıtý úshin paıdalanylǵan elektromegafon, Jeltoqsan kóterilisi negizinde «Allajar» fılmin túsirgen rejısser Qaldybaı Ábenovtiń kesheninen alynǵan materıaldar, Qaırat Rysqulbekovtiń fotosýretteri men jeke qujattarynyń túpnusqasy, ózge de Jeltoqsan kóterilisine qatysýshylardyń zattyq eksponattary men qujattary, fotosýretteri jáne osy tarıhı oqıǵa týraly jazylǵan kitaptar usynyldy.
Kórmeniń ashylýyna Jeltoqsan ardagerleri qatysyp, estelikterimen bólisti. Mádenı-tanymdyq is-sharada B.Momyshuly atyndaǵy Respýblıkalyq «Jas Ulan» mektebiniń, Ulttyq qaýipsizdik komıteti Shekara akademııasynyń kýrsanttary, Almaty qalasy polısııa departamentiniń qyzmetkerleri óner kórsetti.
ALMATY