Býrsa baldyrǵandaryn qýanyshqa bóledi

Sonyń biri – Almaty qalasy basqarmasynyń Mem­lekettik qýyrshaq teatry. Ár­túrli qýyr­shaqtarǵa jan bitirip, sheber oınata bilgen ártisterdiń óneri Býrsa kórermenderine úlken mereke boldy. Almaty qýyrshaq teatrynyń rejısserleri Sul­tanǵalı Shúkirov pen Quralaı Eshmuratova jazǵan shyǵarmany sahnalaýda trosty, planshetti, marıonetka (jipti) jáne tutas tul­ǵaly qýyrshaqtar qoldanyldy.

Bar kórgen-bilgeni smartfon, ertegige senbeıtin, qýyrshaqpen kóp oınaı qoımaıtyn búginginiń balasy úshin teatr – sońǵy aıaldama. Em-domy da osy jerde. Teatr – sulýlyq pen estetıka baspaldaǵy desek, dál osy talap úddesine almatylyq teatrdyń qoıylymy ábden laıyq. 23 jyldan beri ónegeli óner ordasynda eńbek etip kele jatqan Mádenıet salasynyń úzdigi Altaı Táýekelovtiń aıtýynsha, árbir ata-ana balasynyń izgilikke qushtar ári meıirimdi bolyp óske­nin qalasa, olardy qýyrshaq teatry­nyń qoıylymdaryna ákel­geni durys.

Túrkııa tarapy uıymdastyrǵan aıtýly festıvalǵa ekinshi ret qatysyp otyrǵan Almaty qýyr­shaq teatrynyń qorjynynda otandyq jáne sheteldik avtor­lar­dyń shyǵarmalary bar. B­úginde jas rejısserlerdiń tynymsyz izdenisi nátıjesinde qýyrshaq teatrynyń repertýary balanyń oı-órisin keńeıtip, ertegi álemine qumar, teatrǵa degen qyzyǵýshylyǵyn oıatatyn qoıylymdarǵa toly. Daryndy ártis Altaı Batyrbekulynyń aıtýynsha, qýyrshaq teatry maýsymashardan soń birden elimizdiń aýyl-aımaqtaryna gastroldik saparǵa attanady. Elimizdiń túkpir-túkpirinde ornalasqan Mádenıet úılerinde álemge tanymal, balany qyzyqtyratyn tárbıelik máni zor shyǵarmalardy sahnalaıdy.

Almaty qýyrshaq teatry eli­mizdiń kishkentaı kórermenderin ǵana emes, túrkııalyq balalardy da úlken qýanyshqa bóledi. En­di Býrsalyq baldyrǵandar da qa­zaq ertegileri keıipkerleriniń sahnadaǵy áreketin talaı márte áńgimege arqaý etetini sózsiz.

Qundyz ERALY,

jýrnalıst

Túrkııa,

Býrsa qalasy