Búgin Qostanaı oblysynda Parlament Senatyna depýtattyqqa ótý boıynsha saılaý ótti. Nátıjesinde Amanat partııasy fılıalynyń tóraǵasy Bıbigúl Aqqujına atalǵan aımaqtan Senatqa ókil bolyp saılandy, dep jazady Egemen.kz Ortalyq saılaý komıssııasynyń saıtyna silteme jasap.
Komıssııa aqparatyna súıensek, Qostanaı oblysynan Senatqa depýtat saılaný úshin úsh kandıdat úmitker retinde tirkelgen.
Olardyń ishinde Bıbigúl Aqqujına 193 saılaýshynyń daýysyn alyp Senatqa ótti.
Al onyń qarsylastary Rýdnyı máslıhatynyń depýtaty Azamat Ysqaqovqa – 27, Qostanaı aýdandyq aýrýhanasynyń bas dárigeri Álimjan Mirmanov 21 daýys jınady. «Bárine qarsymyn» belgisi bar bıýlletendi 12 adam toltyrǵan.
Sonymen Senattyń sý jańa depýtaty týraly ne bilemiz?
Aqqujına Bıbigúl Berkútqyzy 1971 jylǵy 20 qańtarda Qostanaı oblysynda dúnıege kelgen. Eńbek jolyn Qostanaı memlekettik ýnıversıtetinde psıhologııa oqytýshysy retinde bastady, joǵary bilimin de osy jerden aldy.
2000-2002 jyldary QR Memlekettik qyzmet isteri agenttiginiń Qostanaı oblysy boıynsha departamentiniń mamany bolyp jumys istedi. 2002-2009 jyldary – Qostanaı oblysy ákimdigi Ishki saıasat basqarmasy taldaý jáne monıtorıng júrgizý bóliminiń basshysy.
2009-2016 jyldary Qostanaı oblysy ákimdiginiń Ishki saıasat basqarmasy basshysynyń orynbasary qyzmetin atqardy. Qostanaı qalasy ákiminiń orynbasary laýazymynda boldy. 2017 – 2021 jyldary – Qostanaı oblysy ákimdiginiń Ishki saıasat basqarmasynyń basshysy, oblystyq Qazaqstan halqy Assambleıasy hatshylyǵynyń meńgerýshisi.
2021 jyly Amanat partııasy Qostanaı oblystyq fılıaly tóraǵasynyń birinshi orynbasary qyzmetine taǵaıyndaldy. 2022 jyldyń jeltoqsan aıynan osy ýaqytqa deıin Amanat partııasy Qostanaı oblystyq fılıalynyń tóraǵasy qyzmetin atqardy.