Qurlyqtyq hokkeı lıgasynda (QHL) kúsh synasyp júrgen «Barys» kezekti týrda da jeńilis taýyp, onsyz da qıyn jaǵdaıyn odan ári nasharlatyp aldy.
Desek te bul joly jerlesterimiz jap-jaqsy oıyn órnegin kórsetti. Ýfede «Salavat Iýlaevqa» qarsy ótken matchtyń birinshi kezeńinde astanalyqtar eki ret alǵa shyqty. Bul goldardy Pontýs Oberg (9-mınýt) pen Entonı Kamara (12-mınýt) soqty. Biraq aıdyn ıeleri eki retinde de esepti teńestirip ketti. Úzilisten keıin «Salavat Iýlaevtyń» oıynshylary qatarynan eki shaıbany qaqpamyzǵa toǵytty. Shıelenisti oıyn úshinshi kezeńde de jalǵasyn tapty. Alǵashynda Arkadıı Shestakov (45-mınýt), arada biraz ýaqyt ótkennen keıin Evgenıı Rymarev (55-mınýt) mergendik tanytty. Alaıda teń esepti ustap qalýǵa elordalyq klýbtyń shama-sharqy jetpedi. Básekeniń aıaqtalýyna eki mınýttan asa ýaqyt qalǵanda Bashqurtstannyń hokkeıshileri jeńis golyn saldy. Esep – 5:4.
Qazirgi kezde «Barys» Podolskiniń «Vıtıaz» klýbymen birge kósh sońynda keledi. Ekeýi de 41 oıynnan keıin 31 upaı jıdy. О́ziniń kelesi kezdesýin astanalyqtar búgin Nıjnekamskide «Neftehımıkke» qarsy ótkizedi.