Syrdarııa aýdanynda 80 otbasyna jańa baspana kilti tabys etildi. Osy aýdanǵa jasaǵan sapary aıasynda qýanyshqa kenelgen turǵyndarmen kezdesken oblys ákimi Nurlybek Nálibaev qoljetimdi baspana – Memleket basshysynyń tapsyrmasymen Úkimet pen oblys ákimdigi tarapynan júzege asyrylatyn basty strategııalyq josparlardyń biri ekenin atap ótti.
– Jyl saıyn aımaqta qoldanysqa berilgen turǵyn úı kólemi artyp keledi. Bıyl 4170 páterlik 300 turǵyn úıdiń qurylysy júrgizilip, onyń ishinde 2500-ge jýyq páter óz ıelerine tabystaldy. Osylaısha, 11 myńnan asa jerlesimiz jaıly úıge qonys tepti. Halyqtyń áleýmettik osal toptary úshin 1000-nan asa páter satyp alynýda. Buǵan deıin Aral, Qazaly, Jańaqorǵan, Shıeli, Jalaǵash aýdandarynda 300-den asa otbasy baspana qýanyshyna kenelse, búgin Syrdarııada 80 úıelmen qonys toıyn toılaıdy, – dedi aımaq basshysy.
Kentte boı kótergen 40 úıdiń árqaısysynda 2 páterden bar. Qurylysy bıyl mamyr aıynda bastalǵan úılerdegi ár páterdiń jalpy alańy 65 sharshy metr bolady. Osy jyly Syrdarııa aýdanynyń bıýdjeti 11 mlrd teńgeden asyp, aýdandaǵy kezek kúttirmeıtin túıtkilderdi sheshýge, turǵyndarynyń ómir súrý sapasyn arttyrýǵa baǵyttalǵan qarjy kólemi ulǵaıdy. Aýdandaǵy 72 shaqyrym joldy jóndeýge 3,4 mlrd teńge bólindi.
Oblys eldi mekenderin gazdandyrý baǵytyndaǵy jumystar qala irgesindegi bul aýdanda da jalǵasyp jatyr. Kóp uzamaı «kógildir otyn» ıgiligin kóre bastaıtyn eldi mekender qatarynda aýdandaǵy Sáken Seıfýllın jáne Asqar Toqmaǵambetov aýyldyq okrýgteri tur.
Qyzylorda