Keshe Aqtaý qalasyndaǵy Yessenov University-de Mańǵystaý oblysy ákiminiń orynbasary Qanat Quljanovtyń qatysýymen memlekettik qyzmet salasynyń ardageri, qoǵam qaıratkeri, Mańǵystaý oblysynyń Qurmetti azamaty Saqyp Búrkitbaıuly Kerelbaev atyndaǵy oqý-aýdıtorııanyń saltanatty ashylý rásimi ótti.
Atalmysh jańa oqý aýdıtorııasy kórkem bezendirilip, atalmysh tulǵa haqynda kóptegen málimetter men fotosýretteri ıakı jazǵan eńbekteri erekshe kórinis tapqan.
Saltanatty rásimnen keıin Yessenov University-niń májilis zalynda «Mańǵystaýdyń áleýmettik-ekonomıkalyq damýy jáne S.Kerelbaev fenomeni» atty ǵylymı-kópshilik jıyny ótti.
Ǵylymı jıynda Mańǵystaý oblysy ákiminiń orynbasary Qanat Quljanov resmı quttyqtaý sóz sóılese, sodan keıin qaıratker S. Kerelbaev haqynda zamandas dostary, úzeńgiles áriptesteri: Darjok Seıbaǵytov, Qaırolla Erejepov, Aqmonshaq Baýjanova, Jalǵas Japaqov, Nurnııaz Muqanov, Salamat Nuruly t.b. jáne Yessenov University-niń professor-ǵalymy, fılologııa ǵylymdarynyń kandıdaty, «Qazaq fılologııasy» kafedrasynyń qaýymdastyrylǵan professory Ádilet Qabylov, týǵan-týystary atynan aǵasy, QazKSR eńbek sińirgen dárigeri Saıyn Kerelbaev tushymdy estelikterimen bólisti.
- Mańǵystaý óńirinde qyzmetimizdiń barysynda talaı-talaı el aǵalarymen aralasyp, qoıan-qoltyq baılanysta kelemiz. Solardyń arasynda óz orny erekshe, esimi respýblıkamyzǵa málim, memlekettik qyzmet salasynyń qyzmetkeri, qoǵam qaıratkeri, marqum Saqyp Kerelbaev aǵamyzdyń azamattyǵy men parasattylyǵy bir alabóten edi.
Ardaqty aǵamyz óńirimizdegi jalǵyz bilim ordasy Yessenov University-ne árdaıym qoldaý kórsetip, bizderge kerek jerinde aqyl-keńesin usynyp, ylǵı jaqsy qarym-qatynasta aralasqan tuǵynbyz. Parasatty tulǵanyń ortamyzda bıyl joqtyǵyna da 2 jyldan asyp barady.
Mańǵystaý ólkesinde Saqyp Búrkitbaıulyn bilmeıtin jan kemde kem shyǵar. Aǵamyzdyń etken eńbegi men eren isteri eshýaqytta halqynyń esinen jáne júrek túkpirinen óshpesi anyq. Búgingi ashylǵan oqý aýdıtorııasynda bilim alatyn qanshama myń stýdent shákirtterimiz aǵa esimin ulyqtap, eńbekterine qanyǵyp ósetinderi aıdan anyq.
Abzal azamat, parasatty basshy, kemeńger tulǵa Saqyp Kerelbaev esimi ýaqyt ótken saıyn bıikteı túsip, óskeleń jasurpaqqa jalǵasa bereri haq, - dedi quttyqtaý sózinde Yessenov University-niń Prezıdenti Berik Ahmetov.
Qoǵam qaıratkeri Saqyp Búrkitbaıuly ordabuzar otyzdyń ortasynda Mańǵystaý aýdanynyń birinshi basshysy laýazymyna taǵaıyndalyp, erdiń jasyna jetkende oblys basshylyǵynda uzaq jyl abyroımen qyzmet atqarǵanyn bilemiz. Sol tusta qoıyn-qoltyq jumys istegen aýdandyq máslıhattyń hatshysy qyzmetin atqarǵan Jalǵas Japaqov aqsaqal: - Saqyp – burynǵy babalar sózin qurǵaq jattamaı, qaıtalamaı, búgingi kún turǵysynan, ómirmen, búgingi shyndyqpen baılanystyra sóıleıtin, aqyldy, sheshendik, kósemdik sóz úlgisin ustanǵan búginginiń bıi, – dedi el aǵasy esteligin bólisip.
О́z eńbekterinde Saqyp aǵamyz bylaı deıdi:«Ýaqyt shirkin jaý oǵyndaı jyldam eken. Onyń jyldamdyǵyna ushqan qus ta, júgirgen ań da, tuıaqty tulpar da ilese almasyna kún saıyn kýá bolyp kelemiz. Tańmen talasa bastalatyn tirshilikte taǵylymdy tartý jasaı alsań, ýaqytyńnyń zaıa ketpegeni bolar. Osy rette jasyń ulǵaıyp, qatarlastaryń azaıyp, kóńil kókjıegiń keńip, sanań sarǵaıǵan saıyn ótken ómiriń eske kóbirek túse bastaıdy eken», – depti. Iá, ýaqyttyń júıriktigin, tirliktiń turlaýsyzyn bárimiz bilemiz. Áıtse de, ómir kórgen kisiniń sózi sanamyzǵa ótimdi, júregimizge jetimdi bolmaq. О́ıtkeni osy aqıqatqa ábden kózi jetken azamat ózi ómirden ótse de, artyna ólmeıtin atyn, óshpeıtin hatyn qaldyryp ketti. Endeshe, odan kárimiz de, jasymyz da úlgi-ónege alýymyz qajet-aq.
Yessenov University-niń «Menedjment» kafedrasynyń janynan jasaqtalǵan S.Kerelbaev atyndaǵy oqý aýdıtorııasynda stýdentter negizinen menedjment, memlekettik jáne jergilikti basqarý BBB boıynsha bilim alady. Áıtse de, Saqyp Kerelbaevtyń taǵy bir qyry – qalamgerlik qabiletin nasıhattaý da nazardan tys qalmaıdy. Jastarǵa Kerelbaevtyń qalamynan shyqqan kitaptardy oqytý da josparlanyp otyr.