Jalpy, sońǵy ýaqytta Qyzylordadaǵy N.Bekejanov atyndaǵy drama teatrda jańalyq kóp. О́ner ujymynyń gastroldik saparlarynan bólek, bıyl Syr kórermenderine Muhtar Áýezov atyndaǵy Qazaq ulttyq drama teatrynyń, Ǵabıt Músirepov atyndaǵy Jastar teatry ónerpazdarynyń jáne «Sham» teatry ujymynyń ónerin jergilikti sahnada tamashalaýǵa múmkindik týdy.
N.Bekejanov atyndaǵy oblystyq qazaq mýzykalyq akademııalyq drama teatry dırektory Muhtar Nııazov osynyń bári kórermen talǵamyn qalyptastyrý qadamy ekenin aıtady.
– Jýyrda ǵana Aqberen Elgezektiń «Bolmaǵan balalyq shaq» povesi negizindegi ázirlegen qoıylymymyz anshlagpen ótti. Jalpy, osy shyǵarmany ózek etken spektaklder buǵan deıin Ǵabıt Músirepov atyndaǵy Jastar teatrynda, Ázirbaıjan Mámbetov esimin ıelengen Astanadaǵy teatrda qoıylǵan bolatyn. О́ńirler arasynda birinshi ret Syr sahnasynan kórinip otyr, – deıdi Muhtar Nııazov.
«Bolmaǵan balalyq shaqtyń» úshinshi qoıylymyna kelgen avtor Aqberen Elgezek spektakl aldynda BAQ ókilderimen kezdesti. Avtor-keıipker buıdasy joq balalyǵynyń osy esteligi arqyly ózimen taǵdyrlas balalarǵa jiger beredi. Bir táýlikke jetpeıtin ýaqyt aralyǵynda qaǵazǵa kókirekten tógilip túsken shyǵarma negizinde alda fılm túsirilmek.
Kórermendi eki saǵat sahnaǵa baılap qoıǵan qoıylymnan keıin avtor kóp aldyna shyǵyp, Almaty men Astana teatrlarynan keıin óńirler arasynda birinshi bop qoıylǵan Syrdaǵy qoıylymnyń kóńilden shyqqanyn aıtty. Akterlardyń kásibı oıyndaryna, rejısserdiń sátti sheshimderine tántilik tanytty.
Qoıylymnan keıin teatr foıesinde «Bolmaǵan balalyq shaq» kitaby avtor qoltańbasymen oqyrmandarǵa jol tartty.
QYZYLORDA