Taıaýda Balkashın aýylynyń turǵyndary úshin aq túıeniń qarny jarylǵan oqıǵa oryn aldy. Shyǵarmashylyq úıi men mýzyka mektebi paıdalanýǵa berilip, el erteńi sanatyndaǵy jas urpaq ózderine kórsetilip jatqan qamqorlyqty jas júrekterimen sezinip, arqa-jarqa qýanyp júr.
Búgingi tańda aldyńǵy tolqynnyń ókshesin basyp kele jatqan jastarmen birge balalardyń da bolashaǵyna aıryqsha nazar aýdarylyp keledi. Olardyń bilimdi, bilikti bolýymen qatar, rýhanı kemeldenip, tanym kókjıegi keńeıýine, jaratqan ıe syılaǵan qabiletteriniń arqasynda ónerli bolyp ósýine qolaıly jaǵdaı týǵyzý eń aldymen el erteńin oılaǵandyq. Aýyldyń baıyrǵy turǵyndarynyń biri Florentına Kellerdiń aıtýyna qaraǵanda, ol sonaý 1982 jyly pıonerler úıindegi úıirmelerge qatysqan eken. Keıin bul úı shirkeýge aınalǵan. Odan sońǵy jyldary selo turǵyndary baýyr eti balalarynyń jan-jaqty damýyn ańsaýmen kún keshken. Kóp tilegi qabyl bolyp, qos birdeı shyǵarmashylyq mekemeniń ashylýy erteńge degen el senimin nyǵaıtyp otyr. Aýdandyq bilim bóliminiń meńgerýshisi Araı Ábenovanyń aıtýyna qaraǵanda, balalar men jasóspirimder shyǵarmashylyǵy ortalyǵyndaǵy úıirmelerge 120 bala jazylǵan. Al mýzyka mektebine 60 talapker qatysady, 18 ustaz dáris beredi. Balalar shyǵarmashylyq úıinde segiz úıirme jumys isteıdi. Al mýzyka mektebinde bes baǵytta bilim berý uıymdastyrylǵan.
Jalpy kólemi 828 sharshy metrdi quraıtyn ǵımaratqa 195 mıllıon teńgeden astam qarajat jumsalǵan eken. Qurylys jumysy 2022 jyly bastalyp, bıyl aıaqtalǵan. Oblystyq bıýdjetten 25 mıllıon teńge qarajat bólinip, balalar mekemelerine qolaıly jaǵdaı týǵyzý úshin ıgerilgen. Ata-analar balalarynyń el qatarly ónerli de ónegeli bolyp óserine senip, kóńilderin demdep otyr.
Aqmola oblysy,
Sandyqtaý aýdany