Ulttyq akademııalyq kitaphanada aqyn, bard, qoǵam qaıratkeri Qýanysh Maqsutovtyń «Qut» kitabynyń tanystyrylymy ótti. Elordanyń zııaly qaýym ókilderi, aqyn-jazýshylar men kitapsúıer qalyń oqyrmannyń basyn qosqan rýhanı jıynda óleń týraly óreli áńgime órbidi.
Zamanaýı jetistikter qoldanylǵan jańa kitapqa aqynnyń poezııasy, bardtyq týyndylary, shansondary, avtorlyq ánderiniń mátinderi jáne kósemsózderi toptastyrylǵan. Naqtyraq aıtsaq, birinshi bólimine poezııa, ekinshisine – bardtyq, shansondyq týyndylary, úshinshi bólimine – qalamgerdiń oı-tolǵamdary, kósemsóz jazbalary jınaqtalǵan. Kópshilik oqyrmanǵa arnalǵan jınaqtyń jańalyǵy sol – «AlphaPrint» baspasynan shyqqan kitapta kórsetilgen QR-kod arqyly avtordyń mýzykalyq týyndylaryn tyńdap, aqynnyń jeke YouTube arnasyndaǵy aqparattarmen tanysýǵa bolady.
– Bıyl 60 jasqa tolǵan mereıtoıymnyń aıasynda halqyma bir esep bergim keldi. Sóıtip ózimniń poezııamdy, bardtyq, shansondyq týyndylarymdy, sonymen birge eldik, ulttyń bolashaǵy, zaman týraly ózimniń oı-tolǵamdarym, kósemsózderimdi jınastyryp, «Qutty» jaryqqa shyǵardyq. Ekinshi jaǵynan qazaqtyń kitap shyǵarý jaqsy dástúrin jalǵastyryp, jańa bir lep ákelýge umtyldym, – deıdi avtor.
Kitap keshin aqyn Serikzat Dúısenǵazın tizgindep, jıyndy aqyn, Memlekettik syılyqtyń laýreaty Ǵalym Jaılybaı ashyp berdi.
– Qýanyshtyń óleńdegi joly jazba poezııadan bastalǵan. Tipti kezinde respýblıkalyq «Jiger» festıvaline qatysyp, laýreat atanǵan bolatyn. Keıin aıtysta da óz jolyn qalyptastyrdy. Men Qýanyshty úlken ıntellektýal aqyn dep tanımyn. Aýdarmalarynyń ózi bir tóbe, dep Ǵalym Jaılybaı Qýanysh Maqsutovtyń aqyndyq qyryn joǵary baǵalasa, jazýshy Álibek Asqarov jaryq kórgen sý jańa kitaptyń ereksheligine toqtaldy: – Sýretshi bolǵannan keıin kózimiz eń áýeli kórkemdikke túsedi ǵoı. Ár beti talǵammen bezendirilgen ádemi kitapty qýana qolymyzǵa alyp otyrmyz. Formasy da, qurylymy da erekshe eken, – dedi. Al alashtanýshy ǵalym, professor Aıgúl Ismaqova: – Qýanysh Maqsutov Qaraǵandy oblysynyń Aqtoǵaı degen qasıetti topyraǵynda týǵan. Bul ólke Álıhan Bókeıhan, Álimhan Ermekov, Jaqyp Aqbaev syndy birtýarlardyń týǵan jeri. Sondyqtan bolsa kerek, Qýanyshtyń da boıynda sol babalarynan daryǵan batyldyq bar. Ol aıtysy men jazba poezııasynan da, bardtary men shansondarynan da aıqyn seziledi. Aqyn sóz arqyly, sóz jetkize almaǵan qoǵamnyń ashy shyndyǵyn án arqyly jetkizedi. Alty jasynda Álimhan Ermekovtiń aldyna otyryp, batasyn alǵan Qýanyshtyń basqasha minez kórsetýi múmkin emes, – dep aqynnyń shyǵarmashylyqtaǵy azamattyq kózqarasy men batyl bolmysynyń astaryna úńildi.
Sondaı-aq kitap tanystyrylymynda fılologııa ǵylymdarynyń doktory, professor Amantaı Shárip, jazýshy-pýblısıst, mádenıet qaıratkeri Qaıyrbek Sádýaqasov, belgili sport jýrnalısi Nesip Júnisbaı, aqyn Dáýletkereı Kápuly, taǵy basqalar avtordy jańa týyndysymen quttyqtap, jyly lebizin jetkizdi. Kóp aldynda qara gıtarasyn asynyp shyqqan Qýanysh Maqsutov jıylǵan jurtshylyqqa alǵysyn bildirip, shanson stılindegi óziniń «Qotyrtaı» ánin oryndap berdi. Mazmundy kezdesý sońynda avtordyń ónerdegi aǵa-inisi – Qazaqstannyń eńbek sińirgen qaıratkeri Amantaı Jumashev pen Erlan Dákenov «Aqtoǵaı valsin» shyrqap, kópshiliktiń kóńilin kóterdi.
Al keshke Mýzykalyq jas kórermen teatrynda Qýanysh Maqsutovtyń «Máńgilik muńnyń áýeni» atty poetıkalyq-mýzykalyq qoıylymy kórsetildi. Qazaqstannyń eńbek sińirgen qaıratkeri Ashat Maemırovtiń rejısserligimen qoıylǵan týyndyda jas kórermen teatrynyń ártisteri óner kórsetti. Qoıylym kórermenge poezııa men mýzyka álemine saıahattaýǵa tamasha múmkindik syılady.