Májilis depýtaty, belgili aıtys aqyny Amanjol Áltaı sheteldik óner ıesi Akon-dy áýejaıdan ulttyq kıimmen qarsy alyp, oǵan dombyra syılaǵandardy synǵa aldy, dep habarlaıdy Egemen.kz.
Depýtat mádenı atrıbýttardy ilgerletýde, nasıhattaýda talǵamdy bolý kerek ekenin alǵa tartqan.
- Ulttyq mýzykalyq muramyzdyń sımvoly - qasıetti dombyrany jezókshelik pen áıelderdi qorlaýdy nasıhattaýdyń aıqyn sıpatyna ıe «Smack that», «hypnotiser» sııaqty ánderdi oryndaıtyn ánshige berý – paryqsyzdyq, ulttyq qundylyqtardy tabanǵa taptaý dep qabyldaımyn, – dedi ol depýtattyq saýalynda.
Aıtysker jastardyń Tık-Tok pen Instagramnyń tutqynyna aınalyp, ǵasyrlar boıy kózdiń qarashyǵyndaı saqtaǵan qundylyqtarymyzdan, ulttyq tárbıe ónegesinen ajyrap bara jatqanyna alańdaıtynyn jetkizdi.
- Naqty dálel: Astanada ótken Akon-nyń konsertine baılanysty birneshe aspektlerge toqtalaıyn:
Birinshiden, konsert kezinde jankúıer jastar ánshige ish kıimin laqtyryp, tómen moraldyq minez-qulyq kórsetti, elimizdiń bedeline nuqsan keltirdi.
Ekinshiden, ulttyq ózegi álsiz, ózgeni pir tutqysh jastar ánderdiń kontekstinde baıqalatyn genderlik kemsitýshilik máselesin, qyzdardyń namysyn, abyroıyn qorlaıtyn teris mazmunyn ańǵarmaı esi ketti.
Úshinshiden, «smack that» ániniń mátininen erotıkalyq sıpattaǵy nápsini qozdyrýǵa ıtermeleıtin, sanany laılap, tárbıege teris áser etetin qaýipti mazmundy ańǵaramyz, – dedi depýtat.
Bul rette, halyq qalaýlysy Mádenıet jáne aqparat mınıstrligi shetelden elimizge kiretin mádenı ónimderge, gasroldik saparmen kelýshilerge qoıylatyn naqty talaptar jıyntyǵyn ázirleý kerek ekenin aıtty.
Esterińizge salsaq, amerıkalyq tanymal ánshi Akon-dy áýejaıdan jyly qarsy alǵan astanalyqtar kádesyı retinde dombyrany syıǵa tartqan bolatyn.