Qyzylordada «Inno.Fest Qyzylorda-2023» ınnovasııalyq jobalar festıvali ótti. Aımaq damýyna serpin beretin jańa ınnovasııalyq ıdeıalardy qoldap, IT baǵytqa qyzyǵýshy jastardyń jobalaryn qarjylandyrýǵa jol ashatyn baıqaýǵa qatysqan 250 komanda arasynda óńir jastarynan bólek Astana, Túrkistan qalalarynyń ókilderi boldy.
«Inno.Fest Qyzylorda» – «SmartSity», «Kontent&Dızaın», «Kıno&Vıdeo» baǵyttary boıynsha 24 saǵat ishinde ıdeıadan prototıpke deı̆in IT joba ázirleýdi kózdegen festıval. Onda jastar sıfrly sabaq jospary, telefon alaıaqtarynan qorǵaný, smart týrızm, «sóıleıtin» álippe jobalaryn usyndy.
Festıval qatysýshylaryn beınebaılanys arqyly quttyqtaǵan Sıfrlyq damý, ınnovasııalar jáne aeroǵarysh ónerkásibi birinshi vıse-mınıstri Qanysh Tóleýshın «Inno.Fest» jastardyń izdenisin ulǵaıtyp, qabiletin ashatyn biregeı joba ekenin aıtty. Oblys ákimi apparaty basshysynyń orynbasary Erlan Bákirov aımaq basshysynyń IT salanyń damýyna úles qosyp júrgen jastarǵa árdaıym qoldaý bildiretinin aıtyp, dál qazir bizdiń naryqqa kreatıvti ındýstrııany qalyptastyratyn azamattar keregin atap ótti.
«Jaqynda ǵana oblys ákiminiń qoldaýymen Qyzylordada Seýl ǵylym jáne tehnologııalar ýnıversıtetiniń jasandy ıntellekt jáne joǵary matematıka mektebi ashyldy. Endi bizdiń jastar jasandy ıntellekt salasyndaǵy jańashyldyqtardy meńgerip, Koreıada bilimin jetildirýge múmkindik alady. Sonymen birge bıyl «Inno.Fest» tarıhynda alǵash ret Astana IT ýnıversıtetiniń granty tabystaldy. Bul – talapty jasqa úlken qoldaý», dedi ol.
Festıvalda IT, medıa jáne kınoındýstrııa salasynda jetistikke jetken spıkerler shaqyrylyp, olar jastarmen sheberlik saǵattaryn ótkizip, ıdeıalardy birlese talqylady.
Baıqaýda 9 joba úzdik dep tanyldy. Olarǵa jalpy júlde qory 3 mln teńge bolatyn syıaqy úlestirildi. Birinshi oryn alǵan komandalarǵa – 500 000 teńgeniń, ekinshi orynǵa – 300 000 teńgeniń, al úshinshi oryn tuǵyryna shyqqandarǵa 200 000 teńgeniń qarjylaı sertıfıkattary tabystaldy. Odan bólek, úzdik shyqqan jastarǵa Astana IT ýnıversıtetiniń 3 oqý granty, Qorqyt Ata atyndaǵy Qyzylorda ýnıversıtetiniń 3 oqý granty, «Bolashaq» ýnıversıtetiniń 3 oqý granty, Qyzylorda Ashyq ýnıversıtetiniń 1 oqý granty berildi. Kóptegen qatysýshy festıval seriktesteriniń baǵaly syılyqtaryn ıelendi.
Baıqaýdyń eń jas qatysýshysy 6 jasar Nurzerek Nuradınov pen egde qatysýshy 60 jastaǵy Mavlıýthan Camatovqa arnaıy syılyq tabys etildi. Jastar jobasy júlde ıelengen baıqaýdy Qyzylorda oblysy ákimi apparatynyń Aqparattyq tehnologııalar ortalyǵy men Qorqyt Ata atyndaǵy Qyzylorda ýnıversıtetiniń «Kyzylorda Hub» bıznes-ınkýbatory uıymdastyrdy.
Qyzylorda oblysy