Kóne shahardyń kózindeı bolǵan Almatydaǵy «Kók bazardyń» qadirin onyń baıyrǵy turǵyndary biledi. Endi tarıhqa aınalyp úlgergen, keshegi keńes ókimetiniń tusynda qazirgideı samsaǵan sýpermarketterdiń, qaptaǵan saýda oryndarynyń bolmaǵanyna táýelsizdiktiń bederinde týǵan balalardy sendire almaısyń. Jastardy aıtpaǵanda, jurt biletin, el baratyn dúkender de saýsaqpen sanarlyq bolǵandyqtan, azyq-túlik úshin kóbinese «Kók bazarǵa» ǵana baratynyn ózimiz de umyta bastadyq.
Degenmen búginde osy bazardy on orap alatyn saýda oryndary jetkilikti bolsa da, nege oǵan jańǵyrtý jumystary júrgizilip jatqanyna erekshe toqtalýymyzdyń da jóni bar. О́ıtkeni bıyl qalada «Kók bazardy» súredi eken, ornyna gıpermarket salynady eken degen sybys taraǵanda, qala turǵyndarynyń tarıhı bazardy qıratýǵa qımaǵany ras.
Biraq bazardyń tarıhı kelbeti men onyń mádenı qundylyǵy saqtalynatyn boldy. Pavılondardy jańǵyrtý 2023 jyldyń shildesinde bastaldy, ony 2025 jyldyń sońyna deıin aıaqtaý josparlanǵan. Qurylys-montajdaý jumystaryn júrgizýge QazQSǴZI zertteý qorytyndysy alyndy. Qaıta qurý kezinde bazar shtattyq rejimde saýdasyn jalǵastyra bermek.
Qala ákimi Erbolat Dosaev ortalyq bazardyń ábden tozǵandyqtan, jańǵyrtý týraly sheshim qabyldap otyr.
Kásipkerlik jáne ınvestısııalar basqarmasynyń basshysy Berik Soltanbaev Almaty ákimine jobany júzege asyrýdyń kezeńderi men keleshegi týraly baıandaǵan kezde, ınjenerlik jelilerdi qaıta qurý qarastyrylǵanyn, saýda alańdary jańǵyrtylyp, qasbeti jańartylyp jatqanyn jetkizdi. Sonymen qatar Jibek Joly kóshesi jaǵynan irgeles aýmaqty abattandyrý júrgiziledi, jańa qoǵamdyq keńistik – qala turǵyndary úshin jaıaý júrginshiler aımaǵy paıda bolady.
«Kók bazar» – qaladaǵy erekshe oryn. Munda turǵyndar men qala qonaqtary saýda jasaýǵa kelip qana qoımaı, onyń erekshe atmosferasyn sezinedi. Onyń buzbaı saqtap, tóbesi jabylǵan bazar jasaǵan jón. Bastysy retke keltirý, biraq «Kók bazardyń» qalanyń mádenı menshigi jáne týrıstik orny bolyp qalǵany mańyzdy. Sebebi Almaty «Kók bazarsyz» – Almaty emes, sondyqtan qalamyzdyń tarıhı ortalyǵyn saqtaýdy suraımyn», dedi ákim Erbolat Dosaev.
Buǵan deıin, 2017 jyly qala bazarlaryn jańǵyrtý aıasynda «Kók bazarda» jóndeý jumystary júrgizilip, ashyq konteınerlik qatarlardyń ornyna aýdany 20 myń sharshy metr bolatyn jańa «Qysqy pavılon» salynyp, onyń jartysy saýda alańyna, ekinshi bóligi 400 oryndyq ekideńgeıli avtoparkıngke berilgen edi.
ALMATY