Abaı oblysynda uzyndyǵy 272 shaqyrymdy quraıtyn Baqty – Aıagóz jańa temirjol jelisiniń qurylysy bastaldy. Premer-mınıstr Álıhan Smaıylov telekópir arqyly qurylys jobasyn resmı túrde iske qosty.
Joba Prezıdent Q.Toqaevtyń elimizdiń kólik-tranzıttik áleýetin damytý jónindegi tapsyrmasyn oryndaý aıasynda júzege asyrylýda. Jańa jelini salý barysynda Qytaımen Baqty – Sháýeshek úshinshi shekara ótkelin ashý josparlanyp otyr.
Jalpy, Baqty–Aıagóz temirjol jelisi Qazaqstan men Qytaı arasyndaǵy ótkizý qabiletin 28 mln-nan 48 mln tonnaǵa deıin ulǵaıtýǵa, ońtústiktegi ótkizý beketterindegi keptelisterdi joıýǵa jáne qosymsha tranzıt kólemin tartýǵa múmkindik beredi. Temirjol 2027 jyly paıdalanýǵa beriledi dep josparlanǵan.
Aýqymdy joba jeke ınvestordyń qatysýymen MJÁ qaǵıdaty boıynsha júzege asyrylady. Qurylys barysynda 11 stansa, 47 kópir, 23 temirjol jáne 8 avtomobıl ótkeli, 5 jaıaý júrginshiler kópiri, 16 baqylaý qurylysy salynady. Osy maqsatta otandyq óndirýshilerden 500 myń birlikten astam shpal jáne 36 tonna rels satyp alý josparlanýda. Jergilikti qamtý kem degende 85%-dy quraıdy dep kútilip otyr.
Premer-mınıstr byltyr temirjoldarmen táýelsiz Qazaqstannyń 30 jylyndaǵy eń joǵary júk kólemi tasymaldanyp, 245 mlrd tonna-kılometrdi quraǵanyn atap ótti. Mundaı joǵary qarqyn geosaıası jaǵdaılarǵa jáne ınfraqurylymdyq shekteýlerge qaramastan bıyl da saqtalyp otyr.
«Keıingi bes jylda konteınerlik tranzıttik tasymal kólemi 3,2 ese ósti. Qoldanystaǵy tranzıttik dálizder keńeıip, jańalary ashylýda. Transkaspıı halyqaralyq kólik baǵyty, Soltústik-Ońtústik jáne Ońtústik dálizderi aıryqsha mańyzǵa ıe bolyp otyr», dedi Álıhan Smaıylov.
Qazirgi tańda ótkizý múmkindigi men ınfraqurylymdyq qýat óz shegine jetti. Osy strategııalyq mańyzdy máseleni sheshý úshin temirjol salasynda birqatar ınfraqurylymdyq joba bar.
Olardyń qatarynda Dostyq – Moıynty, Darbaza – Maqtaaral jáne Almaty qalasyn aınalyp ótetin temirjol jelileriniń qurylysy men basqa da jobalar iske asyrylýda. Aldaǵy úsh jylda respýblıkada barlyǵy 1300 shaqyrymnan astam temirjol salynady.
Premer-mınıstr magıstral qurylysy 1700-den astam adamdy jumys ornymen qamtamasyz etetinin atap ótti. Kenishterdi ıgerý jáne júkterdi túsirip-tıeý beketterin ashý da jańa jumys oryndaryn qurýǵa múmkindik beredi.
«Munyń barlyǵy Abaı oblysynyń ǵana emes, búkil elimizdiń ekonomıkasyna oń áserin tıgizedi. Baqty – Aıagóz jobasy Qazaqstan temirjol jelisiniń álemdik kólik júıesine yqpaldasýyn keńeıtedi», dedi Álıhan Smaıylov.
«QTJ» UK» AQ basqarma tóraǵasynyń orynbasary Qanat Álmaǵambetov atap ótkendeı, jańa jeli el eksportynyń kólemin, sondaı-aq Reseıden Qytaıǵa jáne keri baǵyttaǵy júk tranzıtin arttyrýǵa múmkindik beredi.
«Bul jeli arqyly Abaı, Pavlodar, Shyǵys Qazaqstan oblystarynan jáne basqa óńirlerden keletin taýarlar ótedi. Eki joldy jeli qurylysy birden jetkilikti qýattylyqqa ıe bolýǵa kepil bolyp tabylady. Jalpy, bul tranzıttik júkterdiń qosymsha aǵynyn ashyp, jaqyn mańdaǵy aımaqtardy damytýǵa serpin bolmaq», dedi ol.
Is-sharaǵa Abaı oblysy ákimdiginiń, Kólik mınıstrligi, «Samuryq-Qazyna» AQ, «QTJ» UK» AQ basshylary, temirjol salasynyń qyzmetkerleri men ardagerleri qatysty.