Olar Aqjar-2 yqshamaýdanynda ornalasqan «Aqjelken», Ahmet Baıtursynov kóshesindegi «Bolashaq», Belınskıı kóshesindegi «Báıterek» balabaqshalary. Árqaısynyń syıymdylyǵy 290 orynǵa arnalǵan. Oblys ákimi Serik Shápkenov «Aqjelken» bóbekjaıynyń ashylý saltanatyna qatysyp, balalarǵa sapaly bilim men ulttyq tárbıe beretin jobalar aldaǵy ýaqytta da jalǵasatynyn aıtty, dep habarlaıdy Egemen.kz oblys ákimdiginiń baspasóz qyzmetine silteme jasap.
«Taǵy da qýanyshty sát. Balalarymyzdyń ıgiligi úshin salynǵan taǵy bir balabaqsha ashylyp jatyr. Memleket basshysy balalarǵa sapaly bilim, sanaly tárbıe berip, jan-jaqty jaǵdaı jasaý úshin balabaqsha men mektepterdiń sanyn kóbeıtýdi tapsyrdy. Biz qazirgi ýaqytta oblystaǵy balabaqsha sanyn kóbeıtip jatyrmyz. Aldaǵy bes jylda 2-6 jasqa arnalǵan 8000-ǵa jýyq oryndyq bóbekjaı salýdy josparlap otyrmyz. Osynda tálim alǵan tárbıelenýshiler elimizdiń maqtanyshyna aınalsyn degen tilek bildiremin. Ashylǵan balabaqsha berekeli bolsyn!», dedi oblys basshysy.
Balabaqshada ashana, jatyn bólme, oıyn, muǵalimder bólmesi, logoped jáne psıholog bólmeleri bar, sport zaly zamanaýı qurylǵylarmen jabdyqtalǵan. Ashanasyndaǵy taǵamdar sanıtarlyq talapqa sáıkes bólek tońazytqyshtarda saqtalady. Al dáriger bólmesinde balalarǵa alǵashqy kómek kórsetýge qajet barlyq dári-dármek bar.
Ár balabaqshada 26 qyzmetker jumyspen qamtyldy. Balalar kishi jáne úlken toptardan quralǵan 12 topqa bólinedi.
Al tárbıelenýshilerdi qabyldaý jeltoqsan aıynan bastap indigo24.kz aqparattyq júıesi arqyly iske asyrylady.
Osy ýaqytqa deıin memlekettik-jekemenshik áriptestik jobasy aıasynda barlyǵy 870 oryndyq úsh balabaqsha ashyldy. Jyl aıaǵyna deıin taǵy da 890 balany qamtıtyn úsh balabaqsha ashylyp, qajettilik 15,2 paıyzǵa azaıady.