Tynysy ashylǵan Taldyqorǵan

Jetisýda halyqty tabıǵı gazben tolyqtaı qamtamasyz etý jumystary júıeli túrde júrip jatyr. Taldyqorǵan qalasynda búginde 32 466 abonent gazdyń qyzyǵyn kórip otyr. Olardyń qataryna «Úıtas» saıajaıy men «Jastar-2» turǵyn úı alabynyń turǵyndary da kirdi. Jalpy, qala kóleminde abonentterdiń 58 paıyzy tabıǵı gazǵa qosylǵan. Keler jyly Moınaq aýyly kezekte tur.

«Moınaq aýylyna gaz kelse, 220 úıdi qamtymaq. Qala aýmaǵyn tolyq gazǵa qosý jumystary júıeli túrde júrgizilip jatyr. Biz aldaǵy ýaqytta shamamen 4 myń turǵyndy gazben qamtymaqpyz. Atap aıtqanda, «Qaratal», «Qyzyltas», «Merekelik», «Balyqty», «Sarybulaq», «Almaly» jáne «Ashybulaq» saıajaılarymen qatar 1-bólimshe turǵyn úı alabyn da gazdandyramyz. Osylaısha, qala aýmaǵynyń gazǵa tolyq qosylýyn qamtamasyz etemiz», deıdi qala ákimi Bázil Ernat.

Sondaı-aq 2 myńnan asa turǵyndy qam­týǵa múmkindik beretin taǵy da 2 joba júzege asyrylyp jatyr. Olar – «Yn­ty­maq» turǵyn úı alaby men 6, 7-shaǵyn aýdan­dar jáne «Agropro­mysh­lennık» saıa­jaıyn gazdandyrý.

Al aýyz sýmen qamtý máselesine kel­sek, búginde qala aýmaǵyn ortalyq­tandyrylǵan taza aýyz sýmen qamtý 98 paıyzdy qurap otyr. Bıyldyń ózinde qala irgesindegi «Qyzyltas», «Qa­ratal» saıajaılary aýmaǵyna sý quby­ry tartylyp, jumystary aıaqtalýǵa jaqyn. Sonymen qatar «Ulan» áskerı qala­shyǵynda jáne «Jastar 1\1» turǵyn úı alabynda sý qubyry jelilerin qaıta jańǵyrtý jumystary bastalsa, keler jyly bul jumystar Erkin aýylynda jal­ǵasady. Aıta keteıik, 2024 jyly Tal­dyqorǵan qalasynda 47,8 km bolatyn sýmen jabdyqtaý jelileri men 37,4 km sý burý qurylysy bastalmaq.

Bilim salasyndaǵy ózekti másele – oqýshy oryndarynyń tapshylyǵy. Osy rette salynǵan Yntymaq aýylynda 1 200 oryndy mektep qańtar aıynda oqýshylardy qabyldaıdy. Sonymen qatar 2024 jyly «Jaıly mektep» ulttyq jobasy aıasynda Jastar-2 shaǵyn aýdanynda, Batys turǵyn aýdanynda jáne Kóktal aýylynda 3 mektepti salý josparlanyp otyr. Budan bólek, 2024-2025 jyldarǵa zamanaýı IT kolledjiniń qurylysy demeýshiler esebinen jáne Ońtústik-batys turǵyn aýdanynda 1 200 oryndyq mektep qurylysy «Bilim berý ınfraqurylymyn qoldaý qorynyń» qarajaty esebinen salynady.

«Bıyl balalardyń qaýip­sizdigin qamtamasyz etý maqsatynda 26 mektep pen 16 memlekettik balabaqsha arnaıy kúzetpen, beınebaqylaý júıe­lerimen, dabyl túımelerimen qamtamasyz etildi. Sonymen qatar mektepke deıingi bilimmen qamtý boıynsha 4 jekemenshik balabaqsha ashylyp, 1 memlekettik bala­baq­sha kúrdeli jóndeýden ótti.  Jyl sońyna deıin taǵy 1 jekemenshik balabaqsha paıdalanýǵa berilip, «Altyn besik» jekemenshik bala­baqshasynda qosymsha 40 oryn ashý jos­parlanyp otyr», deıdi qala basshysy E.Bázil.

Onyń aıtýynsha, «Qazaqstan Halyq banki» AQ esebinen fýtbol alańynyń qurylysy jyl sońyna deıin aıaqtalady.

Jalpy, oblys ortalyǵynyń damýy­na keletin bolsaq, 11 aıda ónerkásip óndirisiniń kólemi 117,7 mlrd teńgeni quraǵan, ósim – 4 paıyz. Jyl sońyna deıin 130 mlrd teńgege ónim óndirý josparlanyp otyr. Osy jyly 2 ónerkásiptik kásiporyn iske qosylǵan. Atap aıtsaq, «Halyq astyq Ekspo» JShS. Kásiporyn 30 jumys ornyna arnalǵan aýyl sharýashylyǵy ónimderin keptirý elevatory. Ekinshisi – «Altynǵajınov» jún kórpe óndirý sehy. Sondaı-aq «Almaz Keramıks» seriktestigi óndirisin keńeıtken. Búginde kásiporynda 260 adam jumys isteıdi.

Osy oraıda «Medıson-2008» JShS-na toqtala ketsek. Atalǵan kásiporyn medısınalyq maqsattaǵy formalar men jıhaz, jabdyqtar shyǵarýmen aınalysady. Taldyqorǵan qalasynda ornalasqan kompanııa óziniń qýatty óndiristik bazasyna ıe. Onda 50-den asa bilikti maman jumys isteıdi. Olar ásirese ónimniń sapaly shyǵýyna erekshe mán beredi. Bul jerden medısınalyq kereýet, arba, dıvan, ústel, dári-dármek saqtaýǵa arnalǵan shkaf sııaqty medısınalyq jıhazdyń nebir túri bar.

Sondaı-aq óndiristi odan ári damytý úshin kompanııa memlekettik qoldaýdy paıdalana otyryp, «2021-2025 jyldarǵa arnalǵan kásipkerlikti damytý jónindegi ulttyq joba» baǵdarlamasy sheńberinde «Nur bank» AQ-dan nesıe aldy. Kásipker úshin nesıe mólsherlemesi jyldyq 8 pa­ıyz­dy quraıdy.

Kompanııa jetekshisi Alekseı Shaıkın aldaǵy ýaqytta medısınalyq mekemelerdi tehnıkalyq jabdyqtaýdy ǵana emes, sonymen birge medısınalyq kıim tigýmen aınalysatyn qyzmetkerlerdiń jumys úderisin ońtaılandyrýdy oıǵa alýda.

Qalada 17 myńnan astam jumys istep turǵan bıznes sýbektisi bar. Bul ótken jylmen salystyrǵanda 16 paıyzǵa joǵary. Jalpy, oblysta óndiriletin tamaq ónimderiniń 25 paıyzy Taldyqorǵan qalasynyń úlesinde. Halyqtyń maýsym aralyǵyna kartop pen kókóniske qajettiligin qamtý úshin «Jetisý Agro kesheni» kásipornynyń qoımasy qaıtadan jańǵyrtylyp, 6 myń tonnaǵa jýyq ónim ártúrli merzimge saqtaýǵa salynǵan. Bıyl qys-kóktem aılarynda, maýsymara­lyq qymbattaýshylyq kezeńinde olar shektelgen baǵamen satylymǵa shyǵa­rylady. Áleýmettik mańyzy bar azyq-túlik taýar­­larynyń baǵasyn turaq­tandyrý maq­sa­tynda 18 azyq-túlik taýaryn satatyn eki shaǵyn áleýmettik dúken ashylǵan.

Al baspana máselesi de birtindep sheshimin taýyp keledi. Jaqynda «Bereke» kottedj qalashyǵynda 11 otbasyǵa kottedj úı berildi. Qonysqa ıe bolǵandar – kópbalaly otbasylar sanatyndaǵy qala turǵyndary. Esterińizge sala ketsek, buǵan deıin qala kúni qarsańynda 25 otbasyǵa osyndaı baspanalardyń kilti berilgen edi. Búginde oblys ortalyǵynda turǵyn úı kezeginde 15 myńnan asa azamat tursa, sonyń 315-ine páter paıdalanýǵa berildi.Olardyń deni – áleýmettik osal topqa jatatyn azamattar.

«Memlekettiń áleýmettik saıasatynyń basty baǵyttarynyń biri – halyqty turǵyn úımen qamtamasyz etý. Qazirgi tańda óńirde baspana tapshylyǵyn azaıtý úshin ártúrli aýqymdy jumys istelip, jyl saıyn qurylys qarqyny artyp keledi. Bul jumystardy eki ese kúsheıtýimiz qajet», deıdi E.Bázil.

Memleket basshysy oblysqa kelgen jumys saparynda óńirdiń áleýmettik-ekonomıkalyq damýymen, sondaı-aq oblys ortalyǵyndaǵy birneshe nysannyń tynys-tirshiligimen tanysyp, atqarylyp jatqan isti oń baǵalaǵan edi. Totydaı túlegen Taldyqorǵan qalasy óńirdiń maq­tanyshy retinde alǵa nyq qadam basyp keledi.

Jetisý oblysy