Memleket basshysy Joldaýynda «Biz úshin eń mańyzdysy – ár azamattyń Táýelsizdik ıgiligin sezine alýy. Onyń basty kórinisi – eldegi beıbit ómir, qoǵamdaǵy turaqtylyq pen tynyshtyq. Sondaı-aq halyqtyń turmys sapasynyń jaqsarýy jáne jastardyń bolashaqqa nyq senimmen qaraýy. Elimizdiń bilim berý jáne ǵylym salasynyń aldynda kezek kúttirmes aýqymdy mindetter tur» degen edi. Sondaı negizgi mindetterdiń qatarynda 2-6 jasqa deıingi balalardy balabaqshamen qamtý máselesi de bar.
Máselen, Atyraý oblysynyń ákimi Serik Shápkenovtiń aıtýynsha, byltyr 785 oryndyq úsh balabaqsha ashylǵan. Al bıyl memlekettik-jekemenshik áriptestigi aıasynda 2 610 orynǵa eseptelgen 9 balabaqshanyń qurylysy aıaqtaldy. О́tken aptada jańa úsh balabaqsha ashyldy. Jańa nysandardyń qurylysyn «Serpin»-2030» JShS júrgizgen.
Balabaqshanyń biri – Atyraý qalasyna irgeles ornalasqan Aqjar-2 eldi mekeninde ornalasqan «Aqjelken». Al «Bolashaq» jáne «Báıterek» balabaqshalary munaıly shahardyń A.Baıtursynov pen Belınskıı kóshesinde ashyldy. Ár balabaqsha 290 orynǵa arnalǵan.
«Memleketimizdiń basty ustanymy – balalarǵa sapaly bilim, sanaly tárbıe alýǵa qolaıly jaǵdaı jasaý. Prezıdenttiń balabaqsha men mektepterdiń sanyn kóbeıtý jónindegi tapsyrmasyna oraı oblystaǵy balabaqsha sanyn kóbeıtip jatyrmyz. Aldaǵy bes jylda 2-6 jastaǵy balalar úshin 8 myńǵa jýyq orny bar bóbekjaılar salýdy josparlap otyrmyz. Balalarǵa sapaly bilim men ulttyq tárbıe beretin osyndaı jobalar ári qaraı da jalǵasady», dedi S.Shápkenov.
Balabaqshalardaǵy ashana, jatyn bólme, oıyn, logoped jáne psıholog, pedagogter bólmeleri, sportzaly zamanaýı qural-jabdyqtarmen qamtylǵan. Ashanadaǵy taǵamdar sanıtarlyq talapqa saı tońazytqyshta saqtalady. Dáriger bólmesinde balalarǵa alǵashqy kómek kórsetýge qajetti dári-dármektiń bári bar.
Ár balabaqshada 26 adam jumys isteıdi. Balabaqshalarda 12 top ashylǵan. Onda balaqaılar kishi jáne úlken topqa bólinedi.
«Osy kezge deıin memleket-jekemenshik áriptestigi aıasynda 870 oryndyq úsh balabaqsha qoldanysqa berildi. Endi taǵy 890 balany qamtıtyn úsh balabaqshanyń nysany iske qosylady. Bul balabaqshamen qamtý úlesin 15,2 paıyzǵa azaıtady», dedi S.Shápkenov.
Atyraý oblysy