Baspana alý úshin ǵalymdarǵa qoljetimdi kredıt beretin baǵdarlama iske qosyldy. Bul – Ǵylym jáne joǵary bilim mınıstrligi men «Otbasy banktiń» birlesken jobasy.
– Bizdiń mınıstrlik pen «Otbasy bank» birlesip alǵash ret ǵalymdarǵa jeńildetilgen kredıt beretin turǵyn úı baǵdarlamasyn ázirlep, iske qosty. Atalǵan joba biraz pysyqtalyp, sharttary men talaptary aldyn ala talqylanyp, qazir naryqqa usynyldy. Qanatqaqty joba banktiń qarjysyna iske asyrylyp otyr. Negizi elimizde jastardy turǵyn úımen qamtýǵa baǵyttalǵan birqatar joba bary belgili. Jergilikti atqarýshy organdar tarapynan uıymdastyrylǵan baǵdarlamalar aıasynda da bizdiń mamandar úıli bolyp jatyr. Al bul jolǵy jobany banktiń ǵalymdarǵa qoldaýy retinde qabyldaý kerek. Mınıstrlikten atalǵan baǵdarlamaǵa qatysýshy ǵalymdar arasynda salaaralyq basymdyqtar beriletinin ıa berilmeıtinin surap jatqandar kóp. Mundaı basymdyq joq. Mınıstrlikke qarasty ǵylymı uıymdardyń zertteý salalary ártúrli bolǵanymen, qyzmetkerlerdiń bárine turǵyn úı baǵdarlamasyna qatysýǵa birdeı múmkindik berilgen, – dedi Ǵylym jáne joǵary bilim vıse-mınıstri Darhan Ahmet-Zákı.
«Otbasy bank» basshysy Lázzat Ibragımova jeltoqsan aıynyń basynan «Qazaqstannyń jas ǵalymdary» baǵdarlamasy boıynsha ótinim qabyldaý bastalǵanyn aıtty. Baǵdarlama akademııalyq ǵylymmen aınalysatyn jas ǵalymdarǵa arnalǵan. Bir sózben aıtqanda, irgeli ǵylymmen aınalysyp júrgen zertteýshilerge baǵyttalǵan.
– Zertteýler kórsetkendeı, akademııalyq ǵylymda qashan da jas kadrlar tapshylyǵy baıqalady. Qazir bul baǵytta jumys isteıtin jas ǵalymdardyń ótinishterin qabyldap jatyrmyz. Ǵylym jáne joǵary bilim mınıstrligine qaraıtyn ǵylymı nemese ǵylymı-tehnıkalyq qyzmet sýbektisin akkredıtteý týraly kýáligi bar 29 joǵary oqý ornynyń jáne 24 vedomstvolyq baǵynysty ǵylymı uıymnyń qyzmetkerleri qatysa alady. Baǵdarlama «Otbasy bankinde» jyldyq 5 paıyzdyq mólsherlememen, 10 paıyzdyq bastapqy jarnamen kredıt alýǵa múmkindik beredi. Qatysýshylar 20 mıllıon teńgege 19 jylǵa deıingi merzimge baspana ala alady, – dep naqtylady L.Ibragımova.
Osylaısha, jas ǵalymdar baspanaǵa qol jetkizip qana qoımaı, elimizde akademııalyq jumystaryn esh alańsyz jalǵastyra alady. Mysaly, jas ǵalym 20 mln teńgege páter satyp alsa, alǵashqy 8 jyldaǵy aı saıynǵy tólemi 155 myń teńgege teń bolmaq. Osy kezeńnen keıin turǵyn úı kredıtine kóshedi jáne keıingi 11 jyldaǵy aı saıynǵy tólem 84 myń teńgeden bolady.
– Baǵdarlamaǵa Ǵylym jáne joǵary bilim mınıstrligine vedomstvolyq baǵynysty jáne ǵylymı nemese ǵylymı-tehnıkalyq qyzmetti júzege asyratyn ǵylymı uıymdar men joǵary oqý oryndarynyń 40 jasqa deıingi jas ǵalymdary (40 jasty qosa alǵanda) qatysa alady. Baspanaǵa muqtaj jas ǵalymdardyń granttyq nemese baǵdarlamalyq-nysanaly qarjylandyrý sheńberinde ǵylymı jobalar men baǵdarlamalarǵa, ǵylymı-tehnıkalyq qyzmet nátıjelerin kommersııalandyrý jobalaryna qatysqan, magıstr dárejesinen tómen emes jáne ǵylymı-zertteý jumys ótili keminde 3 jyl bolýǵa tıis. Bul jerde ótinim berýshiler arasynda eshqandaı kezek bolmaıdy. Olar ǵylymı uıymnyń basshylyǵynan turǵyn úıge muqtaj retinde joldama alyp, bizdiń bankke júginedi, – deıdi «Otbasy bank» AQ Ortalyq fılıalynyń dırektory Jansultan Mataı.
Belgili bolǵandaı, qatysýshy tólem qabiletin rastaǵannan keıin 3 aıdyń ishinde alǵashqy nemese qaıtalama naryqtan ózi izdep tapqan úıdi alady. Bastysy, úı alýǵa ótinim bergen jas ǵalymnyń, sondaı-aq otbasy músheleriniń atynda keıingi 5 jyl ishinde úı bolmaýǵa tıis. Úı alýshynyń turǵylyqty jerine jáne úıdi qaıdan alatynyna shekteý joq. Aıtalyq, Almaty qalasynda jumys istep júrgen ǵalym úıdi Astanadan da ala alady. Kelisimge sáıkes, «Otbasy bank» jas ǵalymdardy kredıtteý úshin 5 jyl ishinde shamamen 16,6 mlrd teńge bóledi.