Ál-Farabı atyndaǵy Qazaq ulttyq ýnıversıtetiniń «QazUÝ habarshysy. Matematıka, mehanıka jáne ınformatıka serııasy» ǵylymı jýrnaly Scopus ǵylymı derekter bazasyna engizildi.
Scopus – resenzııalanǵan ǵylymı ádebıetterdiń aýqymdy ǵylymı-metrııalyq málimetter bazasy. Onda 5000 halyqaralyq baspanyń 20 myńnan astam jarııalanymy bar. Scopus derekteriniń sapasy ǵylymı-zertteý jumysyn baǵalaý úshin derekqordy paıdalanatyn jetekshi joǵary oqý oryndary men ǵylymı uıymdar, sondaı-aq ýnıversıtetterdiń álemdik reıtıngterin qurastyrý úshin reıtıngtik agenttikter tarapynan moıyndalǵan. Ǵylymǵa bet burǵandar úshin Scopus-pen jumys isteý mańyzdy. Zertteýdiń halyqaralyq ǵylymı basylymdarda jarııalanýy ǵylymı bedeldi arttyrady.
Al Scopus bazasyna engen «QazUÝ habarshysy. Matematıka, mehanıka jáne ınformatıka serııasy» ǵylymı basylymy matematıka, mehanıka jáne aqparattyq tehnologııalar salasyndaǵy jańalyqtardy, ózekti máseleler men jetistikterdi jarııalaıdy. Jýrnal jylyna 4 ret elektrondy formatta shyǵarylady. Birinshi sany jyldyń 20 naýryzyna deıin, ekinshi nómiri – 20 maýsymǵa deıin, úshinshi shyǵarylym – 20 qyrkúıekke deıin, tórtinshi shyǵarylymy 20 jeltoqsanǵa deıin jarııalanady. Scopus málimetter bazasyna «QazUÝ habarshysy. «Matematıka, mehanıka jáne ınformatıka serııasynyń» birinshi habarshysy jáne jalpy úshinshi ǵylymı basylymy enip otyr. Buǵan deıin bul iri derekqorǵa ýnıversıtettiń International Journal of Mathematics and Physics jáne Physical Sciences and Technology jýrnaldary engizilgen.
Scopus derekter bazasyndaǵy mazmundy irikteý boıynsha Saraptamalyq keńestiń saıasatyna sáıkes, ózekti ǵylymı maqalalardy jarııalaý jáne ony derekqorǵa engizý halyqaralyq aýdıtorııa úshin asa mańyzdy ári negizgi kórsetkish. «QazUÝ habarshysy. «Matematıka, mehanıka jáne ınformatıka serııasy» zertteletin salaǵa akademııalyq úles, Scopus jýrnalyndaǵy maqalalarǵa silteme jasaý, redaktorlar men avtorlardyń geografııalyq taralýy, jarııalaý etıkasynyń anyq jáne jalpyǵa qoljetimdi málimdemeleri sııaqty baǵalaý kórsetkishteri negizinde resenzııalanyp tańdalyp alynǵan.
Basylymǵa avtorlar tarapynan buryn jarııalanbaǵan, qazaq, orys nemese aǵylshyn tilderinde jýrnaldyń taqyryptyq baǵyttaryna sáıkes keletin jáne qoljazba formatynyń talaptaryna sáıkes ázirlengen maqalalar qabyldanady. Sondaı-aq Creative Commons Attribution lısenzııasynyń sharttary boıynsha avtorlar qoljazbalaryna moraldyq quqyqtaryn saqtaıdy, sonymen birge basqalarǵa maqalasyn erkin júkteýge, qaıta paıdalanýǵa, qaıta bastyrýǵa, ózgertýge, taratýǵa nemese kóshirýge múmkindik bere otyryp, osy jumystyń avtorlyǵyn mindetti túrde rastaı otyryp jáne osy jýrnaldaǵy biregeı basylymǵa silteme jasaı alady. Osy áreketterdiń barlyǵy úshin jýrnalǵa silteme kórsetilgen kezde avtorlardan nemese baspadan ruqsat talap etilmeıdi.
Jýrnaldyń redaksııalyq alqasy jetekshi otandyq jáne sheteldik ǵalymdardan quralǵan. Scopus-pen qatar, jýrnal CrossRef, EBSCO, DOAJ, Reseılik ǵylymı dáıeksóz ındeksi, Web of Science sııaqty belgili ǵylymı-metrııalyq derekter qorlarynda da ındeksteledi. Byltyr jýrnal Web of Science derekter bazasyna engizilip, bıyl ındeksteý bazasynyń birinshi ımpakt-faktoryn aldy. Jýrnal jarııalanymdaryna bedeldi halyqaralyq konferensııalardyń jınaqtarynda jáne reıtıngi joǵary ǵylymı jýrnaldarda silteme beriledi.
«QazUÝ habarshysy. «Matematıka, mehanıka jáne ınformatıka serııasy» ǵylymı basylymynyń Scopus-qa enýi – ulttyq ýnıversıtettiń ınternasıonaldandyrý jáne zertteý ýnıversıtetin qalyptastyrý baǵytyndaǵy nátıjeli jumystarynyń aıqyn kórinisi. Atalǵan jýrnaldaǵy ǵylymı maqalalar ýnıversıtettiń halyqaralyq ǵylymı bedelin kóterýge laıyqty úles qosyp kele jatqany Scopus derekter bazasynyń Saraptamalyq keńesi tarapynan joǵary baǵalanyp otyr.