Almatyda Qazaqstan-Brıtan tehnıkalyq ýnıversıteti stýdentterge toǵyz qabatty eki jataqhanany qoldanysqa berdi, dep habarlaıdy Egemen.kz.
Jastarǵa qoljetimdi ári sapaly bilim berýmen qatar, stýdentterge jańa jataqhanalar salý – elimizdegi mańyzdy baǵyttardyń biri. Stýdentterdi zamanaýı úlgide salynǵan, jaıly ári qaýipsizdik jaǵy qarastyrylǵan jataqhanalarmen qamtamasyz etýge basymdyq berilgen. Qazaqstan-Brıtan tehnıkalyq ýnıversıteti osy baǵytta Almaty qalasy ákimdigimen, Qazaqstan Respýblıkasynyń Ǵylym jáne joǵary bilim mınıstrligimen etene jumys istep jatyr. Bul rette QBTÝ stýdentterge 980 oryndyq toǵyz qabatty eki jataqhana korpýsynyń qurylysyn aıaqtap, qoldanysqa berdi. Saltanatty is-sharaǵa Almaty qalasy Jastar saıasaty basqarmasynyń basshysy Qaıyrjan Meńdiǵalıev, «NNEF» qoǵamdyq qorynyń Qamqorshylyq keńesiniń tóraǵasy Tımýr Qulybaev, «NNEF» qoǵamdyq qorynyń quryltaıshysy Dınara Qulybaeva, QBTÝ rektory Maratbek Ǵabdýllın, BI Group qurylys kompanııasynyń negizin qalaýshy-kompanııanyń Dırektorlar keńesiniń tóraǵasy Aıdyn Rahymbaev, joǵary oqý ornynyń qyzmetkerleri, stýdentter men olardyń ata-analary qatysty.
«О́tken jyly biz stýdentterimizge barlyq jaǵdaıy jasalǵan jataqhana ashamyz dep sheshim qabyldadyq. 10 aıdyń ishinde biz úlken jumys istedik. Kórip otyrǵandaryńyzdaı, jalpy aýdany 14.000 sharshy metrden astam eki jańa ǵımaratta syıymdylyǵy 980 oryndyq jataqhana men sport kesheniniń qurylysyn aıaqtadyq. Osylaısha, Almaty qalasyndaǵy stýdentterdiń turǵyn úı qajettiligin tolyǵymen sheshken alǵashqy ýnıversıtet atanyp otyrmyz», dedi QBTÝ rektory Maratbek Ǵabdýllın.
Aıta keteıik, elde, stýdentter jataqhanasy tapshy, ásirese bul másele Almatyda qatty sezilip jatyr. Máseleniń oń sheshimin tabý úshin qazirgi ýaqytta megapolıste jataqhana qurylysyn tıimdi úılestirý maqsatynda Jobalyq keńse de iske qosylǵan. Jobany qoldaýǵa 114 áleýetti ınvestor ótinish bildirgeni aıtyldy. Almaty ákimi Erbolat Dosaevtyń aıtýynsha, qalada 2025 jyldyń sońyna deıin 12 myń, 2030 jyldyń sońyna deıin taǵy 20 myń jataqhanalyq oryn ashylady. Bul jataqhana tapshylyǵy máselesin tolyǵymen sheshedi. Osy oraıda jataqhana tapshylyǵy máselesin sheshýge Qazaqstan-Brıtan tehnıkalyq ýnıversıteti alǵashqylardyń biri bolyp kirisken. Al qurylysty joǵary oqý orny jeke qarajaty esebinen bastaǵan.
«QBTÝ 980 oryndyq eki jataqhanany qoldanysqa berip otyr. Bilesizder, Prezıdent tapsyrmasyna oraı, qalada jańa jataqhana qurylysy belsendi túrde qolǵa alynǵan. Almatyda 35 joǵary oqý orny bar, bul oqý oryndarynda jalpy 200 000-ǵa jýyq stýdent bilim alyp jatyr, al onyń ishinde 124 000 stýdent basqa qaladan kelgender. Iаǵnı, barlyq stýdentterdiń 62%-y Almatyǵa basqa óńirlerden kelip oqyp jatqan stýdentter. Oqý jylynyń basynda 95 jataqhana bolsa, onda 32 000 stýdent jataqhanaǵa ornalasqan. Al jataqhanaǵa 65 000-ǵa jýyq stýdent tapsyrys bergen. Sondyqtan jataqhana tapshylyǵy – 32 700 oryn. Qyrkúıek aıynyń sońyna deıin 1500 oryndyq 7 nysandy iske qostyq. Osy aıda 2 500 oryndyq taǵy da 7 nysan iske qosylady. Almaty qalasynyń damý baǵdarlamasy boıynsha 2030 jylǵa deıin jataqhana tapshylyǵyn tolyǵymen sheshýimiz qajet, ıaǵnı 32 000 oryndy qamtıtyn nysandardy qoldanysqa berýimiz kerek», dedi Almaty qalasy Jastar saıasaty basqarmasynyń basshysy Qaıyrjan Meńdiǵalıev.
QBTÝ-dyń jańa jataqhanalar eski korpýstardyń ornynda salynǵan. Osy aralyqta magıstranttar men stýdentter úıiniń qyzmetkerleri stýdentterdi jaıly jataqhanamen qamtamasyz etýmen qatar, barlyq qyzmetterdi kóshirip, ınfraqurylymdardyń odan ári tolyqqandy jumys isteýi jolynda úlken is atqarǵan. Aıtaıyq, jańa ǵımarattardyń qurylysy 2023 jylǵy aqpanda bastalyp, jeltoqsanda tolyq aıaqtalǵan.
«Stýdentterdiń jaqsy bilim alyp, jan-jaqty damýyna jaǵdaı jasap otyrǵandaryńyzǵa alǵysymyzdy jetkizgim keledi. Ýnıversıtettiń bizge kórsetken qoldaýyn baǵalaımyz. Jańa jataqhana akademııalyq otbasymyz úshin progrestiń sımvolyna aınalyp, stýdentterdiń qutty úıi atansyn», dedi Dıana Serikbaeva.
Jańadan salynǵan jataqhana korpýstarynda demalatyn oryn, asbólmeler, oqý bólmeleri, 120 oryndyq akt zaly, 70 oryndyq ashana, kir jýatyn oryndar, tósek-oryndardy qabyldaıtyn jáne tapsyratyn bólmeleri qarastyrylǵan. Ár jataqhana korpýsynda eki lıft, beınebaqylaý kameralary men Wi-Fi ornatylǵan, ár bólmeniń jýynatyn bólmesi men dárethanasy jeke. Aıta keteıik, jataqhanada múmkindigi shekteýli stýdentterge arnaıy jabdyqtalǵan bólmeler de bar. Atalǵan ǵımarattardyń qurylysy QBTÝ-dyń jeke qarajaty esebinen júrgizilgen, al merdiger bolyp ashyq tender arqyly BI-Group qurylys kompanııasy tańdalǵan.
«Jastarǵa osyndaı formattaǵy ǵımaratty salyp berý biz úshin úlken qýanysh. QBTÝ elimizdegi úzdik oqý oryndarynyń biri, tehnıkalyq bilim beretin úzdik oqý orny. Bizge senim artqandaryńyz úshin alǵysymdy bildiremin», dedi BI Group qurylys kompanııasynyń negizin qalaýshy-kompanııanyń Dırektorlar keńesiniń tóraǵasy Aıdyn Rahymbaev.
Jataqhanadan bólek QBTÝ syıymdylyǵy 198 oryndyq trıbýnasy bar oıyn zalynan turatyn úsh qabatty sport kesheniniń qurylysyn aıaqtaǵan. Jańadan salynǵan sport kesheninde stýdentter ústel tennısi, boks, kúres, fýtzal, voleıbol, basketbol, gandbol jáne basqa da sport túrlerimen aınalysýǵa jaǵdaı jasalǵan. Odan bólek horeografııa sabaqtaryn ótkizýge arnalǵan zal, jattyǵý zaly da osy sport kesheninde qarastyrylypty.
Osylaısha, Qazaqstan-Brıtan tehnıkalyq ýnıversıteti stýdentterdi jataqhanamen tolyq qamtamasyz etip otyrǵan eldegi bilim ordalarynyń biri atanyp otyr.