Prezıdentterdiń úshinshi ekskýrsııasy «Petergof» memlekettik mýzeı-qoryǵynyń Úlken Petergof saraıynda jalǵasty, dep habarlaıdy Egemen.kz Aqordanyń baspasóz qyzmetine silteme jasap.
Delegasııa basshylary sándik-qoldanbaly óner buıymdary, músin jáne keskindeme óneriniń týyndylary men jıhazdar qoıylǵan biregeı sáýlet eskertkishin tamashalady.
Petergof mýzeı-qoryǵy 33 mýzeıden, 414 gektar aýmaqty alyp jatqan saıabaqtar men baqtardan jáne 150-den astam sýburqaqtan turady. Sorǵy stansııalarynyń joqtyǵy sýburqaq júıesiniń tarıhı jáne mádenı eskertkish retindegi biregeıligi sanalady. Injenerlik sheshimniń arqasynda sý 300 jyl burynǵydaı bıiktik pen ártúrli deńgeıdegi sýburqaqtar arasynan tabıǵı túrde qulaı aǵyp jatyr. Sondyqtan Petergof sýburqaqtary sáýirdiń aıaǵynan qazan aıynyń ortasyna deıin kún saıyn tańerteńnen keshke deıin jumys isteıdi.