Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsınniń óńirge jumys sapary barysynda Qostanaı oblysy aýmaǵyndaǵy eldi mekenderdi mobıldi ınternetpen jáne talshyqty-optıkalyq baılanys jelisimen qamtamasyz etý jónindegi Jol kartasyna qol qoıyldy.
Sıfrlandyrý mınıstriniń málimetinshe, qazirgi tańda oblys ınnovasııalyq ónim kólemi boıynsha birinshi orynda tur. Baǵdat Mýsın Qostanaı oblysynda ınnovasııalyq ónimdi damytý ekonomıkalyq áleýetti jaqsartýǵa, ınvestısııalardy tartýǵa, jańa jumys oryndaryn qurýǵa, básekege qabilettilikti arttyrýǵa jáne óńirdiń tehnologııalyq turǵydan ilgerileýine yqpal etetinin aıtty.
Oblys ákimi Qumar Aqsaqalov óńirdiń ınvestısııalyq tartymdylyǵyn arttyrý úshin sıfrlandyrý jáne ınnovasııalardy engizý máselelerine kóp kóńil bólinetinin bildirdi. Ákimniń sózinshe, keıingi 5 jyl ishinde osy baǵytta 48 mlrd teńgege 300-ge jýyq sıfrlyq joba iske asyrylǵan. Munyń 37 mlrd teńgesin jeke ınvestorlar quıyp otyr.
«Mysaly, Sokolov-Sarybaı taý-ken baıytý óndiristik birlestigine qarasty Qorjynkól jáne Sokolov-Sarybaı ken oryndarynda «Aqyldy karer» avtomattandyrylǵan júıesi iske qosyldy. Investısııa kólemi 1 mlrd teńgeden asady», dedi oblys ákimi.
Baǵdat Mýsın mınıstrlik «KazSat» baılanys spýtnıgi boıynsha Qostanaı oblysynyń 43 aýylyn ınternetpen qamtamasyz etýdi, 2025 jyldyń sońyna deıin 87 5G bazalyq stansasyn ornatýdy, «Starlink» tehnologııasy arqyly 180 aýyldyq mektepti ınternetke qosýdy jáne 325 aýylǵa talshyqty-optıkalyq baılanys jelisin jetkizýdi josparlap otyrǵanyn aıtty. Mınıstrdiń aıtýynsha, Jol kartasy sheńberinde 226 aýylda mobıldi ınternet baılanysynyń sapasyn jaqsartý, jergilikti atqarýshy organdar esebinen 161 aýylǵa munara antenna ornatý kózdelgen.
Baǵdat Mýsın jumys sapary aıasynda Qostanaıdaǵy oblystyq sporttyq baǵdarlamalaý federasııasynyń ókildigin resmı túrde ashty.
«Búgingi tańda sporttyq baǵdarlamalaý – zııatkerlik sporttyń keleshegi bar salasy. Munda jastar baǵdarlamalaý tilin paıdalana otyryp, kúrdeli matematıkalyq esepterdi sheshedi. Bizdiń oqýshylar men stýdentter IOI jáne ICPC sııaqty halyqaralyq jarystarda turaqty tabystarǵa jetip, reıtıngte joǵary oryndardy ıelenip keledi. Sondyqtan búgin ashylyp otyrǵan ókildik sporttyq baǵdarlamalaýdy damytýda jáne daryndy baǵdarlamashylardyń jańa býynyn qalyptastyrýǵa septigin tıgizedi degen senimdemin», dedi mınıstr.
Jańa ortalyqta balalar men jasóspirimderge arnalǵan sporttyq baǵdarlamalaý jarystary ótetin bolady. Mundaı is-sharalar jastardyń zııatkerlik sportqa degen qyzyǵýshylyǵyn damytýǵa yqpal etpek.
Baǵdat Mýsın odan keıin Qostanaıdaǵy halyqqa qyzmet kórsetý ortalyqtarynyń birine bas suqty. «Azamattarǵa arnalǵan úkimet» memlekettik korporasııasynyń basqarma basshysy Mırjan Jańabaev mınıstrge Qostanaı qalasyndaǵy halyqqa qyzmet kórsetý ortalyǵynyń 2-bólimi jóndeýden ótip, Arqalyqta jańa halyqqa qyzmet kórsetý ortalyǵy ashylǵanyn jetkizdi. Mınıstr óńirde qosymsha halyqqa qyzmet kórsetý ortalyqtaryn ashýdyń mańyzdy ekenin aıtyp, aldaǵy jyly Qostanaı qalasy men aýdandarda jumys istep turǵan HQKO fılıaldaryn jańǵyrtýdy tapsyrdy.
Qostanaı oblysy