Qurylysy bes jyl buryn bastalǵan «Uly dala» shaǵyn aýdanynda qazirgi kezde júzden astam turǵyn úı bar. Shaǵyn aýdan halqy orta mekteptiń tapshylyǵyn aıtyp shaǵymdanyp júretin. Endi, mine, sol olqylyqtyń orny toldy. 1 200 oryndyq sý jańa mektep paıdalanýǵa berildi.
Derekke sensek, «Uly dalada» qazir 25 myń turǵyn bar. Áýeli jol azabyn tartqan shaǵyn aýdan halqynyń muńyna qulaq asqan jergilikti bılik byltyr kókeıkesti máseleni ońynan sheshti. О́ńir basshysy Erbol Qarashókeev shaǵyn aýdan turǵyndarymen ótken kezdesýde máselelerdiń bári nazardan tys qalmaıtynyn, tikeleı baqylaýyna alatynyn aıtqan-dy. Sózinde turdy. Buǵan deıin №54 mektepke qatynap oqyǵan «Uly dala» oqýshylarynyń jańa bilim ordasynyń tabaldyryǵyn attaǵany kóńil qýantady. Bilim oshaǵyn salý úshin jergilikti bıýdjetten 3,1 mlrd teńge bólingen. Bul – 2023 jyly óńirde paıdalanýǵa berilgen tórtinshi mektep.
– Bul kúndi «Uly dala» turǵyndary saryla kútti. Sondyqtan olardy qýanyshymen quttyqtaımyn. Jańa bilim ordasynyń tabaldyryǵyn attaǵan balalar elimizdiń atyn álemge áıgileıtin myqty azamat bolyp qalyptasýyna tilektespin. Ustazdar bilim alýshylarǵa bar bilgenin úıreterine senimim kámil, – dedi mekteptiń ashylý saltanatynda oblys ákiminiń orynbasary Q.Mádibek.
Eńbek ardagerleri Sharafı Qaldarbekov pen Erejepbaı Bekeev bilim ordasynyń lentasyn qıyp, qonaqtar oqý ordasynyń materıaldyq-tehnıkalyq bazasymen tanysyp shyqty. Munda lıngafon kabınetteri, zerthanalar, 350 adamǵa arnalǵan májilis zaly, oqý zaly, kitaphana, 400 oryndyq ashana men sheberhana bar. Sondaı-aq 56 oqý kabıneti ınteraktıvti taqtamen jabdyqtalypty. Oqý ordasynda 58 ustaz sabaq beredi.
Aıtpaqshy, qazirgi ýaqytta atalǵan shaǵyn aýdanda bıyl tapsyrylady dep josparlanǵan 4 400 oqýshyǵa arnalǵan taǵy 3 mekteptiń qurylysy júrip jatyr.
TARAZ