«Myrzakent» maqta zaýytynyń Shardara, Jetisaı, Maqtaaral aýdandaryndaǵy maqta qabyldaý pýnktterinde myńǵa jýyq adam eńbek etedi. Jalpy quny mıllıard teńgeni quraıtyn, AQSh-tyń sońǵy úlgidegi jańa tehnologııasymen jabdyqtalǵan zaýyttyń óndiristik qýattylyǵy jylyna 60 myń tonna. Biraq shıkizattyń jetispeýshiligine baılanysty bıyl 40 myń tonna maqta qabyldaǵan.
Maqtaaral aýdanyna jumys saparymen kelgen Parlament Senatynyń depýtattary Á.Bektaev, M.Qadyrbek jáne A.Satybaldıevpen kezdesýde jumysshylar sıfrlyq tehnologııa nátıjesinde basqa zaýyttarmen salystyrǵanda eńbek ónimdiligi 30 paıyzǵa joǵary ekenin aıtty. Sondaı-aq kezdesý barysynda óndiris ornyndaǵy eńbek qaýipsizdigi, jumysshylardyń áleýmettik jaǵdaıy sóz boldy. Senatorlar «Jastar ortalyǵy» KMM ǵımaratynda aýdan turǵyndarymen kezdesti. Kezdesý barysynda aýdan kóleminde sheshimin tappaı jatqan túrli áleýmettik-ekonomıkalyq másele kóterildi. О́z kezeginde senatorlar turǵyndar kótergen máselelerdiń sheshimin tabýyna atsalysatyndaryn jetkizdi.
Al Májilis depýtaty Temir Qyryqbaev Maqtaaral aýdanynda qoǵamdyq qabyldaý ótkizdi. Qabyldaýǵa kelgen azamattar mektepterdi jylytý, PÝID-2 baǵdarlamasynyń qurylysy, toǵaı alqaptaryn memleket menshigine qaıtarý, drenajdardy iske qosý, ýchaskelik jer telimi, medısınalyq nysandardyń ahýaly, áleýmettik sala, aýyz sý boıynsha máseleler kóterip, suraqtar qoıdy. О́z kezeginde halyq qalaýlysy qoıylǵan suraqtar boıynsha tıisti sala basshylarynyń jaýabyn qarady. Jergilikti jerde sheshiletin máselelerdi dereý qolǵa alýdy tapsyryp, respýblıkalyq deńgeıde sheshiletin máselelerdi Parlament tórinde kóteretinin jetkizdi.
Sondaı-aq Jetisaı aýdanyna jumys saparymen barǵan depýtat «Amanat» partııasy Jetisaı aýdandyq fılıalynyń ǵımaratynda qoǵamdyq qabyldaý ótkizdi. Jańa jyldyń alǵashqy jumys kúninde ótken qabyldaýǵa kelýshiler májilismenge apatty jaǵdaıdaǵy kóppáterli úılerdiń ornyna jańa úı salý jáne mektepterdiń kúrdeli jóndeýi, medısınalyq pýnkt salý, gazdandyrý jáne materıaldyq kómek kórsetý sekildi máselelerdi kóterip, quqyqtyq keńester aldy. Máseleleri boıynsha jazbasha ótinishterin berdi. Al Jetisaı qalalyq emhanasynyń qyzmetkerlerimen kezdesýde medısına salasynyń mamandary jumys tetikterin jetildirý boıynsha birqatar máseleni zańnamalyq deńgeıge shyǵarýdy, tarıf belgileý ádistemesi men saqtandyrylýshynyń mártebesin qaıta qaraýdy, aýyldaǵy medısına kadrlarynyń tapshylyǵyn tómendetýdi, medısına qyzmetkerleriniń kásibı jaýapkershiligin saqtandyrýdy qolǵa alýdy surady.
Túrkistan oblysy