Qostanaıdaǵy Ybyraı Altynsarın memorıaldyq mýzeıinde uly aǵartýshy ashqan Torǵaıdaǵy tuńǵysh mekteptiń 160 jyldyǵyna arnalǵan ádebı-tanymdyq kesh ótti. Is-sharaǵa aǵartýshy negizin qalaǵan mektepten bilim alǵan túlekter, oblystyq mádenıet mekemeleriniń basshylary, mektep muǵalimderi qatysty.
Taǵylymy mol keshke Ybyraı ashqan Torǵaı mektebiniń túlegi, belgili ǵalym, Jahandyq sý áriptestiginiń Qazaqstandaǵy tóraǵasy Narıman Qypshaqbaıuly da arnaıy kelip, tuńǵysh mekteptiń tarıhy jaıynda qyzyqty estelikter aıtty. Ǵalym Ybyraı Altynsarın mýzeıine jeke zattary men zertteý eńbekterin tabys etti.
Is-shara barysynda Y.Altynsarın atyndaǵy mamandandyrylǵan mektep-gımnazııa ınternaty oqýshylarynan quralǵan hor «Ybyraı shákirtteriniń marshy» ánin oryndady. Mektep tarıhy jaıynda derekti fılmderden úzindi kórsetilip, Ybyraı mektebinen túlep ushqan belgili qaıratker tulǵalar týraly aıtyldy.
Atalǵan keshte Torǵaıda ashylǵan tuńǵysh mektepten túlep ushqan ár salanyń maıtalman mamandary, óńirge belgili ǵalymdar men ustazdar da sóz aldy. Kóp jyl boıy Torǵaı mektebinde basshylyq qyzmet atqarǵan ardager ustaz, Qazaqstan halyq aǵartý isiniń úzdigi Sultanǵalı Álmaǵambetuly mýzeı ujymyna Ybyraı mektebi týraly estelik kitaby men tuńǵysh bilim ordasynyń tarıhyna qatysty qundy qujattardy tartý etti.
Qostanaı oblysy