Májilis depýtaty Baqtyqoja Izmuhambetov óńirlerge sapar barysynda Batys Qazaqstan oblysyna baryp, qaıta jańartylyp jatqan strategııalyq nysandardyń jumysymen tanysty.
О́ńirde depýtat shekarashylarmen kezdesip, «Syrym» shekaralyq ótkizý beketindegi jaǵdaıǵa nazar aýdardy. «Shekaradaǵy, kedendegi jumysqa baılanysty týyndaıtyn suraqtyń barlyǵyn jınaqtap, tanysyp, bilý úshin arnaıy keldim. Áli de sheshilmeı jatqan máseleler bolsa, qolymyzdan kelgenshe kómek berip, Úkimetke, Memleket basshysyna jetkizý úshin issaparda júrmiz», dedi Baqtyqoja Izmuhambetov.
О́z kezeginde shekarashylar Batys Qazaqstan oblysy men Reseı arasyndaǵy shekarada júk kólikteri táýliktep kezek kútetinin aıtty. Aldaǵy ýaqytta tekserý beketteriniń sanyn kóbeıtip, kólik ótetin jolaqtardyń sanyn arttyrý josparlanyp otyr.
«Rekonstrýksııa jasalǵan soń, bekettiń ótkizý qabileti táýligine 25 myń adamǵa deıin jetedi. Bul qazirgi kórsetkishten eki esege kóp. Kún saıyn biz arqyly 8 myń kólik ótedi. Onyń 1,5 myńy júk kóligi. Shekaranyń ótkizý qabileti jetildirilgen soń, 15 myń kólik qatynaı alady», dedi BQO Shekara qyzmeti departamenti bastyǵynyń orynbasary Talǵat Shaımardanov.
Aıta ketý kerek, qarjylandyrýdyń joqtyǵyna baılanysty osy shekaraǵa qatysty birqatar másele áli sheshimin tappaǵan. Bulardyń barlyǵyn depýtat óz baqylaýyna alatynyn aıtty.
Odan ári depýtat Syrym ótkizý beketinen 12 shaqyrym qashyqta ornalasqan «Mahambet» shekara bólimshesine, «Batys» óńirlik qolbasshylyǵynyń jáne 5517 áskerı bólimine baryp, ofıserler men kelisimshart boıynsha mindetin atqaryp jatqan áskerı qyzmetshilermen kezdesti.
«Memleketimizdiń irgesi berik bolý úshin shekara qyzmeti men áskerı bólimderdiń materıaldyq bazalaryn zamanaýı jabdyqtarmen jabdyqtaý mańyzdy. Bul – kezek kúttirmeıtin máseleniń biri. Taǵy bir mańyzdy túıtkil – munda mobıldi jáne ınternet baılanysy múlde joq. Qajet kezde roýmıng arqyly aqyly túrde qosyla alady. Osy sekildi máselelerdi aldaǵy ýaqytta Májiliste kóteremiz», dedi Baqtyqoja Izmuhambetov.