О́ńirlerdegi ózekti máseleler eskeriledi

Máýlen Áshimbaev jer-jerde aýyl men aýdan­ jurtshylyǵy kótergen máseleler Palatanyń aldaǵy jumysynda nazarǵa alynatynyn aıtty.

«Jańa jyldyń alǵashqy kúnderinde óńirlerge baryp, jurtshylyqpen kezdesýler ótkizdik. Sonyń barysynda halyqty alańdatyp otyrǵan ózekti máselelerge nazar aýdaryp, turǵyndarmen birge talqy­ladyq. Endi senatorlardan mańyzdy máse­le­ler boıynsha depýtattyq saýaldar kúte­miz. Sondaı-aq atalǵan túıtkilder par­la­menttik tyńdaýlar men Úkimet saǵat­taryn ótkizý kezinde de eskerilýge tıis. Azamattar kótergen problemalar sena­tor­lardyń udaıy nazarynda bolady. Biz olardy oń sheshý baǵytynda naqty jumys júrgizýimiz kerek», dedi Senat tóraǵasy.

Máýlen Áshimbaev otyrys barysynda Memleket basshysynyń «Egemen Qazaqstan» gazetine bergen suhbatynda belgilengen mańyzdy mindetterge de toqtalyp ótti. Palata spıkeri el Prezı­dentiniń tikeleı tapsyrmasymen Bıýdjet jáne Salyq kodeksteriniń jobalary ázirlenip jatqanyn aıtyp, senatorlardy atalǵan zańdardyń Senatqa kelýin kútpesten, tıisti jumysty bastaı berýge shaqyrdy. Sondaı-aq ol ortaq maqsatqa qol jetkizý úshin barsha otandastarymyzdyń judyryqtaı jumylyp áreket etýi asa mańyzdy ekenin atap ótti.

Aldaǵy Palata otyrysynda senatorlar «Qazaqstan Respýblıkasy­nyń keıbir zańnamalyq aktilerine eksporttyq-kredıttik agenttik jáne shıki­zattyq emes taýarlardyń (jumys­tardyń, kórsetiletin qyz­metterdiń) eksportyn ilgeriletý máse­leleri boıynsha ózgerister men tolyq­tyrýlar engizý týraly» zańdy ekinshi oqylymda qaraıdy. Bul zań Azamat­tyq jáne Bıýdjet kodeksterine, sondaı-aq taǵy 8 zańǵa túzetýler engizýdi kózdeıdi.

Buǵan deıin atap ótilgendeı, qujat Memleket basshysynyń tapsyrmasyn oryndaý maqsatymen ázirlendi. Zań shıkizattyq emes eksportty damytý jáne ilgeriletý salasyndaǵy ulttyq ınstıtýt mártebesine ıe eksporttyq-kredıttik agenttik qurýǵa baǵyttalǵan.

Sonymen qatar depýtattar «2014 jylǵy 29 mamyrdaǵy Eýrazııalyq ekono­mıkalyq odaq týraly shartqa ózgerister engizý týraly hattamany ratıfı­kasııalaý týraly» zańdy qaraıdy. Zań quqyq qoldaný kezinde anyqtalǵan qu­qyqtyq retteýdegi olqylyqtardy joıý­ǵa jáne termınologııany biryńǵaı standartqa keltirýge arnalǵan.

Zań normalaryna sáıkes EAEO Komıs­sııasyna úshinshi elderge qatysty standarttaý, arnaıy qorǵaý, dempıngke qarsy, ótemaqy sharalary bóliginde ókilettikter berý jáne basqa da birqatar ózgerister qarastyrylǵan.

Odan bólek, Bıýro otyrysynda Par­lament Májilisinen kelip túsken zańdar Senattyń turaqty komıtetterine bólinip berildi.