Qaraǵandy óner mektebiniń oqýshylary Dýbaıda ótken halyqaralyq baıqaýdan bas júldemen oralyp, oljaly bolyp jatyr. Olar qazaq kúılerinen poppýrı oryndap, tyńdarman qaýymdy tánti etken.
Qazaqtyń sekirtpe kúıin sheber oryndaǵan jas órenderdiń ónerin sheteldik qazylar erekshe yqylaspen baǵalaǵan.
«Oqýshylarym óner kórsetip bolǵannan keıin sheteldik qazylar janymyzǵa kelip, tańdanystaryn jetkizdi. Ulttyq aspapty qoldaryna ustap, shertip kórdi. Dombyranyń únine tamsanyp, biraz turdy. О́nerimizge joǵary baǵa berdi. Keýdemizdi maqtanysh kernedi. Endi Eýropada ótetin halyqaralyq baıqaýǵa qatysýdy kózdep otyrmyz», deıdi dombyra úıirmesiniń muǵalimi Jánibek Qazybekuly.
Halyqaralyq baıqaýǵa Túrkııa men Qyrǵyzstannyń da ónerpazdary qatysypty. Qaraǵandylyq jas kúıshiler úlken sahnada óner kórsetip, baq talastyrý ońaıǵa túspegenin aıtady. О́nerpazdardyń ishindegi Tóken Baıjigittiń dombyra úıirmesine qatysqanyna bir jyl ǵana bolǵan. Talpynysy tańdaı qaqtyrǵan. Mine, Dýbaıdaǵy úlken dodada baq synap otyr.
– Men Dýbaıda ótken baıqaýda qatty qobaljydym. Bas júlde alǵanda qatty qýandym. Árıne, biraz eńbektendik. Eńbegimiz aqtaldy. Osyndaı halyqaralyq deńgeıde óner kórsetý ońaı emes. Ári qaraı da sheberligimdi shyńdaımyn. Muǵalimderden bárin úırenip, sahna tórinde jarqyraǵym keledi, – dedi jas kúıshi.
Oljaly oralǵan jas kúıshiler ansambli aldaǵy ýaqytta bolatyn basqa da halyqaralyq baıqaýlarǵa daıyndyqtaryn jalǵastyrmaq. Repertýarlaryn jańǵyrtyp, jańa kompozısııalar qospaq.
Qaraǵandy oblysy