Májilis depýtaty, «Amanat» partııasy fraksııasynyń múshesi Maksım Rojın Almaty oblysyna jumys sapary barysynda Jambyl aýdanynda ornalasqan «Altyn qadam» óndiris oshaǵynyń tiginshilerimen júzdesti. Olar Ádiletti Qazaqstandy qurý isindegi áıelder rólin talqylady.
Qazirgi tańda tigin fabrıkasynda 100-den asa adam jumyspen qamtylǵan. Tigin sehy negizinen memlekettik jáne sheteldik tapsyrysty oryndaıdy. Búginde reseılik temirjol qyzmetkerlerine arnaıy kıimder tigip jatyr. Qyzmetkerlerdiń ortasha eńbekaqysy 150-200 myń teńgeni quraıdy. Ondaǵy jumysshylardyń 95 paıyzy názik jandar.
Kezdesýde halyq qalaýlysy Maksım Rojın genderlik teńdikti qamtamasyz etý, qyz-kelinshekterdiń quqyǵyn qorǵaý jáne otbasylyq qundylyqtardy nyǵaıtý máselesi árqashan Memleket basshysy Qasym-Jomart Toqaevtyń nazarynda ekenin atap aıtty.
«Prezıdent ana men balany qorǵaý, otbasy tárbıesi men otbasylyq qundylyqtar máselesine erekshe kóńil bólip kele jatyr. Aınalyp kelgende, memlekettiń de basty tiregi baqytty, tatý-tátti otbasy. Sondyqtan otbasyndaǵy izgilik, adamgershilik, syılastyq qarym-qatynasty berik saqtaý mańyzdy. Munyń qundylyǵyn sizderden artyq eshkim bilmeıdi. Qazaqtyń qyzdary otbasyn da, Otanyn da teń terbep otyr», dedi májilismen.
Kezdesý barysynda fabrıka ókilderi ózderiniń jumystary jaıynda aıtyp, shıkizatqa baılanysty ózekti máseleler baryn alǵa tartty, tolǵandyrǵan suraqtaryn qoıdy.
«Qazirgi zamanǵy naryqtyq saýda júıesiniń mindeti – sórelerde otandyq ónimderdiń turaqty túrde qoldaý taýyp, satylymda bolýy óte mańyzdy. Otandyq kásiporyndar memleket tarapynan qoldaý taýyp ta keledi. Biraq biz shyǵaratyn ónimderdiń shıkizaty Qazaqstanda joq. Sondyqtan basqa elden aldyrtamyz. Al sol taýarlardyń 30 paıyz salyǵyn biz keden beketterine tóleýge májbúrmiz», deıdi fabrıka ókili Ámına Qanashaeva.
Taraptar óńirdegi ózekti máselelerdi jáne olardy zań júzinde sheshý joldaryn talqylady. Máseleniń anyq-qanyǵyna jetken májilismen bul máseleni óz baqylaýyna alatynyn jetkizdi.
Jumysshylar óńirde mundaı tigin fabrıkalar keıingi ýaqytta qarqyndy damyp kele jatqanyn atap ótip, memlekettik satyp alýlar zańy aıasynda sheteldik emes, otandyq ónimniń neǵurlym kóbirek satylý tetikteri qarastyrylsa degen tilekterin bildirdi.
Almaty oblysy