Memleket basshysy Qasym-Jomart Toqaevtyń Jarlyǵymen Almaty oblysynyń ortalyǵy Qapshaǵaı qalasynyń ataýy resmı túrde Qonaev bolyp ózgertilip, Alash jurtyn qýanyshqa keneltkeli ekinshi jylǵa jýyqtady. Osy ýaqyt aralyǵynda esimi tórtkúl dúnıege málim asa kórnekti memleket jáne qoǵam qaıratkeri Dinmuhamed Ahmetuly Qonaev atyndaǵy qalanyń bet-beınesi jańasha sıpatqa ıe bolyp, ınfraqurylymy qarqyn alyp keledi.
«Qapshaǵaıdyń boı kóterýine Dımash Ahmetulynyń sińirgen eńbegi eren. Esimi berilgeli qala kún ótken saıyn jańaryp jatyr. Keleshekte qalanyń irgesi keńeıip, irgeli oqý oryndarynyń ashylǵanyn, ǵalamat nysandardyń boı kótergenin kórsek degen tilegimiz bar», deıdi Qonaev qalasynyń turǵyny, zeınetker Jaqan Aqaev.
Kún ótken saıyn ajary aıshyqtala bastaǵan Qonaev qalasy qazirgi tańda 4 baǵyt – turǵyn úı, abattandyrý, kógaldandyrý, týrızm jáne aýyl sharýashylyǵy boıynsha damyp keledi. Qalada 1 300 gektar aýmaqty quraıtyn óndiris oshaǵy bar bolǵandyqtan, bul salaǵa aıryqsha mán berilip otyr.
Qala ákimi Nurlan Qumataevtyń málimdeýinshe, Qonaev qalasynda qosalqy stansa salý josparlanǵan. Eger ındýstrııalyq jáne ınfraqurylymdyq jobalar josparǵa saı júzege assa, 40 myń jumys orny ashylady.
Qalada týrızm salasyn damytýǵa erekshe kóńil bólinip otyr. Byltyr osy baǵytta qyzmet kórsetetin 130-ǵa jýyq nysanǵa 1,2 mln-nan asa demalýshy kelgen. Jyl saıyn týrızm salasyna keletin ınvestısııa kólemi eseleı túsýde. Soǵan saı qala kóriktenip, jaǵajaılar zamanaýı úlgide jasaqtalyp, jabdyqtalyp jatyr. Qapshaǵaı sý qoımasynyń 5,1 shaqyrym jaǵajaıy tolyǵymen abattandyrylyp, tirek qabyrǵa salý josparlanǵan.
Búginde qalanyń kúretamyryna aınalǵan S.Seıfýllın kóshesin tórt jolaqqa keńeıtý qurylystary aıaqtalýǵa taıaý. Jalpy uzyndyǵy 5,2 shaqyrymdy quraıtyn kósheniń qurylys jumysyna 3,4 mlrd teńge bólingen. Sonymen qatar qalanyń bas josparyna sáıkes, Abaı kóshesi arqyly «Arna» jáne 10-shaǵyn aýdandy jalǵastyratyn jol salynsa, qaladaǵy kólik qozǵalysy rettelip, tynysy ashyla túseri sózsiz.
Jańasha sıpatqa ıe qalaǵa kireberis aınalma jolda «Qonaev» degen jazýy bar áripter kompozısııasy túrindegi monýmenttiń birden kóz tartary anyq. Sondaı-aq osy monýmenttiń qasyna Almaty oblysynyń rámizi retinde tegis bolattan quıylǵan «Qar barysynyń» músini boı kótergen.
Eli úshin eren eńbek etip, ter tókken Dinmuhamed Ahmetulynyń Alataýdaı asqaq beınesi somdalǵan eńseli eskertkishi qaıta qalpyna keltirilse, 5-shaǵyn aýdandaǵy kópqabatty úıdiń qasbetine uly tulǵanyń muraly salynyp, qala turǵyndarynyń kózqýanyshyna aınalǵan.
Zamanynyń zańǵary D.Qonaevtyń 112 jyldyǵyna oraı oblystyń bilim oshaqtarynda «Qonaev – ǵasyr adamy» atty ashyq sabaqtar men synyp saǵattary ótkizilip, ónerli balalardyń qatysýymen túrli baıqaýlar uıymdastyrylyp keledi. Sondaı-aq erler komandalary arasynda shaǵyn fýtboldan týrnır ótkizý josparlanǵan.
12 qańtar – D.Qonaevtyń týǵan kúninde eskertkishine gúl shoqtaryn qoıyp, rýhyna taǵzym etip, qurmet kórsetý aınymas dástúrge aınalǵan. Osy kúni «Taǵylymy tereń tulǵa» atty kórme uıymdastyrylyp, is-shara sońy «Qonaevtyń súıip tyńdaǵan ánderi» atty mýzykalyq keshpen qorytyndylanady.
Almaty oblysy