«Qazaq ádebıeti» gazetiniń jaryqqa shyqqanyna 90 jyl tolyp otyr. Saltanatty is-shara Almaty qalasyndaǵy «Dostyq» úıinde ótti, dep habarlaıdy Egemen.kz Mádenıet jáne aqparat mınıstrliginiń baspasóz qyzmetine silteme jasap.
Basylymnyń mereıtoıyna arnalǵan sharanyń shymyldyǵy Mádenıet jáne aqparat mınıstri Aıda Balaevanyń quttyqtaý sózinen bastaldy. Mınıstr ǵasyrǵa jýyq tarıhy bar basylymdy mereıtoıymen quttyqtaı kele, kópshilikke Memleket basshysynyń quttyqtaýyn jetkizdi.
«Ǵasyrǵa jýyq ýaqyt ishinde gazet qalyń oqyrmany bar bedeldi basylym retinde qalyptasyp, tól tarıhymyzdyń jarshysyna aınaldy. Alǵashqy sandary «Qazaq ádebıeti» ult mádenıetin kóterýde úlken oryn alsyn!" degen uran sózben jaryq kórgen aptalyq árdaıym osy údeden shyǵa bildi. Basylym ulttyq qundylyqtardy, qazaq qalamgerleriniń týyndylaryn keńinen dáriptep, rýhanııatymyzdyń órkendeýine ólsheýsiz úles qosyp keledi», delingen Prezıdenttiń quttyqtaý hatynda.
Mınıstr jýrnalıst ardagerlerge «Eńbek ardageri» medalin tabys etti, olardyń arasynda Israıl Saparbaı, Gúljamal Temıreeva jáne basqa da jýrnalıster bar. «Aqparat salasynyń úzdigi» tósbelgisimen «Qazaq ádebıeti» gazetiniń tilshisi Móldir Raıymbek marapattaldy.
Mádenıet jáne aqparat mınıstrliginiń Qurmet gramotasy men Alǵys hattarymen ádebı gazette eńbek etken qalamgerler de marapattaldy.