Dýbaıda ótken 2000 metrlik ushqyr báıgede 13 tulpar baq synaǵan. Baby men baǵy kelisken qazaq tulpary kil júırikter arasynan shyn júırik ekenin dáleldep, máreni birinshi qıǵan. Dýbaıdy dúbirletken Kaverhan tulpardyń qazirgi ıesi – Astanada turatyn oraldyq Tilek Muhambetqalıev. Bul týraly Batys Qazaqstan oblysy «Báıge» federasııasynyń baspasóz qyzmeti ınstagram paraqshasynda jazdy, dep habarlaıdy Egemen.kz.
Atalǵan tulpardy Qazaqstanǵa 2021 jyly 1.5 jasynda Nadır Hasanov degen atbegi Amerıkadan óziniń dosyna Almatyǵa ákelip bergen. Onyń aıtýynsha, alǵashqy jarysyn Almaty ıppodromynda bastaǵan júırikti Rýslan Iýldashev daıyndaǵan. Sol jyly Kaverhan ushqyr báıgede úsh resmı start jasap, júldeger atanǵan. Sóıtip óz qashyqtyǵynda eki jastaǵy arǵymaqtar arasynda Qazaqstannyń eń úzdik ushqyry atanǵan. Keıin ony báıge naýqany aıaqtalǵan soń oraldyq Tilek Muhambetqalıev satyp alyp, Reseıge alyp ketedi. Reseıde Kaverhandy Arystangereı Shavýev esimdi jattyqtyrýshy daıyndap, Reseıde eki ret Derbıdiń úzdigi atandyrady. Jalpy ol jaqta alty start jasap, onyń beseýinde birinshi bop kelgen. Sońǵy búkilreseılik bas Derbıde ǵana Heromo atty tulpardan keıin ekinshi bop kelgen eken.
2023 jyldyń qarasha aıynda at ıesi Kaverhandy Dýbaıdaǵy báıgelerge synaýǵa alyp barady. Dýbaıdaǵy jattyqtyrýshysy – Dýglas Ýotson. Aıtarlyǵy 85-105 reıtıngindegi tulparlarǵa arnalǵan gandıkap báıgesinde Kaverhan Reseıde qalyp qoıǵan Heromodan oza shapty. О́zge qarsylastary da osal emes, olar ár túrli elderden kelip, Dýbaıda bir jylǵa jýyq daıyndyqta turǵan. Kaverhan ol jaqta nebári eki aıdaı ǵana daıyndalyp shapqan eken. Endi Kaverhannyń aldynda taǵy bir osyndaı báıge tur. Sol jerde úzdik atansa Búkilálemdik kýbok úshin baq synaıdy.
Kaverhannyń jeńisi – Jaıyq óńiriniń týmasy, belgili atbegi Tilek Muhambetqalıevtiń esimin álemdik sport tarıhyna jazdy.