Atyraýda on jyl buryn qurylǵan Jastar teatry bar. Jas óner ujymyn qurýǵa atsalysqan Mahambet atyndaǵy akademııalyq qazaq drama teatrynyń ártisteri Gúlnur Qaıyrlıeva men Ámirjan Nurlanuly trýppa múshelerin stýdentter men joǵary synyp oqýshylarynyń arasynan tańdaǵan.
Qazir jastar teatrynda 25 jas akter jumys isteıdi. О́nerli jastar aýdandarǵa, kórshiles oblystarǵa gastrolge shyǵyp, sheteldik teatr festıvaldarynda top jaryp júr. Biraq osy kezge deıin derbes ǵımaratqa qol jetkize almap edi. Tipti teatrdyń tirkeý kýáligi de bolmaǵan. Bul, árıne, kórermendi sahnalyq qoıylymdarmen sýsyndatýdy kózdegen talantty jastardyń ónerine tusaý bolary daýsyz.
Mádenıet jáne aqparat mınıstrligi Mádenıet komıtetiniń tóraǵasy Kúmis Seıitovanyń aıtýynsha, óner ujymy 66-shy bolyp tirkelgen. Teatr ujymyna tirkeý týraly kýálik pen derbes ǵımarattyń berilýine oraı ótken is-sharaǵa tanymal óner ókilderi qatysty. Onyń arasynda Qazaqstannyń eńbek sińirgen qaıratkeri, rejısser Ashat Maemırov, Kann kınofestıvaliniń júldegeri, belgili kınoaktrısa Samal Eslıamova, teatr jáne kıno akterleri, «Daryn» syılyǵynyń ıegerleri Aıan О́tepbergen men Asylhan Tólepov, «Serper» jastar syılyǵynyń laýreaty, Batys Qazaqstan oblystyq kameralyq orkestriniń dırektory Saltanat Ábilǵazıeva men M.Áýezov atyndaǵy ulttyq drama teatrynyń aktrısasy, «Sahnager» ulttyq teatr syılyǵynyń laýreaty Ajarlym Baǵytjanova bar.
«Atyraý – el mádenıetine zor úles qosyp kele jatqan óńir. Qazaq mádenıetiniń qaıratkerleri, belgili tulǵalar salǵan izdi ónerli jastar jalǵastyrýdy qolǵa aldy. Jastar teatryna jóndeý júrgizilgen D.Nurpeıisova atyndaǵy munaıshylar saraıynyń ǵımaratyn berý týraly sheshim qabyldadyq», dedi oblys ákiminiń orynbasary Jasulan Bısembıev.
Tanymal kompozıtor, Qazaqstan jáne Qyrǵyzstannyń eńbek sińirgen qaıratkeri, Qazaqstannyń Eńbek Eri Ilııa Jaqanov jas ujymǵa batasyn berdi. Al Jastar teatrynyń ujymy aǵylshyn dramatýrgi Bernard Shoýdyń «Kleopatra» tarıhı dramasyn kórermen nazaryna usyndy.
Jastar teatrynyń enshisinde halyqaralyq baıqaýlardyń birneshe júldesi bar. Máselen, 2019 jyly Ispanııanyń Lloret de Mar qalasynda ótken «Theatrical Talents» teatrlar festıvaline rejısser Muqanǵalı Tomanovtyń «Zatmenıe» qoıylymymen qatysyp, bas júldeni ıelendi.
Al 2021 jyly Kerch qalasynda udaıy ótetin «Bosporskıe ogonı» atty halyqaralyq antıkalyq óner festıvaline qatysty. Bul festıvalǵa atyraýlyq jastar «Sezar jáne Kleopatra» pesasynyń jelisimen «Kleopatra» dramasynyń premerasyn usyndy. Bas rejısseri – Muqanǵalı Tomanov. Festıval qorytyndysynda atyraýlyq óner ujymy bas júldeni ıelense, «Úzdik áıel beınesi» atalymy teatr aktrısasy Ǵaını Kýkatovaǵa berilgen edi.
Atyraý oblysy