Pavlodar oblysynyń turaqtandyrý qory qystyń sońǵy aılary men uzynsary kelip jetetin kezeńge azyq-túliktiń jetkilikti kólemin saqtap otyr. Áleýmettik mańyzǵa ıe azyqtyń 8 túri boıynsha arzan ónimder qazir jergilikti naryqqa shyǵaryldy. Al kókónis salynǵan qaptardyń aýzy tek aqpan aıynda ǵana ashylady dep josparlanǵan.
О́ńirlik turaqtandyrý qorynda 12 túrli azyq-túliktiń 15 myń tonnasy saqtalyp tur. Bul – túptep kelgende jalpy somasy 3 mlrd teńgeniń ónimi. Turaqtandyrý qory aýyl sharýashylyǵy óndirýshilerimen 6 635,9 tonna kartop, 1 081 tonna sábiz, 671,3 tonna pııaz, 1 300 tonna qyryqqabat, 476 tonna kúrish jetkizýge forvardtyq sharttar jasasqan.
«Pavlodar ÁKK» AQ basqarmasy tóraǵasynyń orynbasary Bek Orazǵulovtyń aıtýynsha, oblystyń seriktes saýda núktelerinde arzan azyq-túlik jetkilikti. Bıyl kókónis pen kartoptyń baǵasy oblysta erekshe arzan bolyp turǵany málim. Sýpermarketterde «ekinshi nannyń» kelisi tipti 90-100 teńgeden satylyp jatyr. Osyny eskere kelip, qorda turǵan kókónisterdi naryqqa tek aqpan aıynda ǵana shyǵarý uıǵarylǵan.
– Endi bir aıdan soń jergilikti saýda núktelerinde arzan kókónis azaıyp, qoımalarda saqtalyp turǵan ónimder jetkizile bastaıdy. Bul ýaqytta baǵanyń kóterilýi – zańdy qubylys. Naryqtyq jaǵdaıdy eskere otyryp, aqpan aıynda qordaǵy kókónisterdi áleýmettik dúkender men seriktes satý núktelerine jetkizýdi bastaımyz. О́ńir boıynsha mundaı seriktesterimizdiń sany – 263, úsh qalany qoıyp, olar barlyq aýdanda ornalasqan. Jalpy, turaqtandyrý qorynan bosatylatyn ónimge ústemeaqy 10 paıyzdan aspaýy kerek. Bul boıynsha arnaıy shartta kórsetilgen. Jurtshylyqqa yńǵaıly bolýy úshin azyq-túlik dúkenderi men núktelerdiń barlyǵynda qolma-qol aqshasyz tólem qarastyrylǵan. Kásipkerlerdi yntalandyrý jaǵy da eskerilip, aınalym qarajatyn tolyqtyrýǵa jyldyǵy 3 paıyzben arzan nesıe usynyp kelemiz. Esesine olar bizdiń sharttarymyzdy oryndap, qoımalardan jetkizgen azyq-túlik pen kókónisterge ústeme baǵany 10 paıyzdan asyrmaı ustap tur. Oblys ortalyǵyndaǵy «Jailau» fermerlik naryǵynda kásipkerlermen 23 shart jasaldy. Munda «Egistikten sórege deıin» qaǵıdaty barynsha saqtalyp, áleýmettik mańyzy bar azyq-túlik túrleri naryqtaǵy baǵadan 15-20 paıyz arzanǵa satylady. Oǵan qosa atalǵan bazarda et satatyn oryndardy kóbeıttik, – deıdi áleýmettik-kásipkerlik korporasııa ókili.
Kúzden beri aımaqta qus jumyrtqasynyń baǵasy da kóterilip kele jatqany belgili. Jumyrtqa baǵasyn turaqty ustap turý úshin burnaǵy jyly turaqtandyrý qory 6,5 mln dana jumyrtqa satyp alǵan. Onyń 1,5 mln danasy ótken jyly jergilikti saýda salasyndaǵy kásipkerlerge arzan baǵada bosatyldy. Qoıma esebinde turǵan 5 mln dana qus jumyrtqasy aldaǵy jazǵa deıin jetedi dep boljanyp otyr. Ádette aımaqta jumyrtqa baǵasy naryqta ónim kóbeıgen ýaqytta, sáýir-mamyr aılarynda tómendeıtini málim. Qazir ónimniń ondyǵy (I suryp) qordan 426 teńgeden bosatylsa, al áleýmettik dúkenderde 468 teńgeden satylyp jatyr.
Pavlodar oblysy aýyl sharýashylyǵy basqarmasy basshysynyń orynbasary Tólegen Kósherbaev jurtshylyqty áleýmettik nanmen qamtamasyz etý sharalary da oıdaǵydaı júrip jatqanyn jetkizdi. «Azyq-túlik korporasııasy» AQ 3,8 myń tonna bıdaı bólip (tonnasyna 90 myń teńge baǵamen), jergilikti naýbaıhanalarmen nannyń bólkesin 93 teńgeden asyrmaý týraly memorandýmdar jasalǵan.
Aıtyp óteıik, ótken jyly Ulttyq statıstıka bıýrosy Ertis-Baıan óńirindegi áleýmettik mańyzy bar azyq-túlik taýarlary baǵasynyń ındeksi 2,7 paıyzdy quraǵanyn tirkedi. Áleýmettik mánge ıe 19 azyq-túlik túri bar bolsa, sonyń 15-i boıynsha Kerekýdegi ortasha baǵa respýblıkalyq mánnen tómen ekeni anyqtalǵan. Al I surypty un, qaraqumyq jarmasy, sary maı, sút (2,5%), aıran (2,5%), kartop, sábiz, qyryqqabattyń arzandyǵy jóninen elimiz boıynsha TOP-5-ke endi. Tek ótken jyldyń sońynda sıyr eti men makaron ónimderiniń azdap qymbattaǵany belgili boldy.
Pavlodar oblysy